Probinsya sa Sugbo ‘tabang sa taga Marawi
CEBU, Philippines - Andam mohatag ang probinsya sa Sugbo og hinabang ngadto sa Marawi City nga padayon nahimutang sa kagubot tungod sa pag-atake sa Maute-Abu Sayyaf terror group.
Si Gob. Hilario Davide III ug Bise Goberandor Agnes Magpale uban sa Hunta Probinsyal gikatakdang magtigom aron sutaon kun unsa nga tabang ang ilang ihatag.
Hinuon dili sila mopadala og hinabang didto sa Marawi samtang nasige pa ang binakbakay didto aron paglikay nga mabutang sa risgo ang mga personnel sa probinsya nga maoy muhatod sa maong hinabang.
Matud sa gobernador nga hinoon mamahimong ipadala na lang sa coast guard o iagi sa Department of Social Welfare and Development (DSWD) ang hinabang.
Si Board Member Sun Shimura, isip committe chair on peace and order sa provncial board mipadayag nga andam siya mo-sponsor og resolusyon kabahin niini.
Sa laing bahin, ang mga parokyano sa Santo Niño Catholic Parish sa Lungsod sa Santa Fe nipahigayon og Special Collection sa tulo nila ka Misa sa adlaw nga Domingo aron itabang sa mga katawhan sa Marawi City ma-Muslim man o Kristiyano.
Matud ni Fr. Roy Bucag, ang kura paruko sa maong parokya nga nahinabi sa Banat News usa sa ilang ipadala ang mga tubig ug pagkaon.
Sumala pa niya ang ilang nakolekta ilang itunol sa Caritas Visayas aron kini na ang magpaigo sa palitong hinabang para sa mga nanginahanglan. Le Phyllis F. Antojado ug Rowena Capistrano (BANAT NEWS)
- Latest
