Ex-convict nisuway’g panglugos gipatay

CEBU, Philippines - Napalgang patay ang usa ka ex-convict diha sa kadagatan sa Sitio Tunga, Barangay Tanke sa Dakbayan sa Talisay kagahapon sa buntag.

Ang biktima nailhan nga si Evo Lastimosa alyas Boy Tilaw, 40, nga taga Dakbayan sa Naga.  Adunay samad pinusilan ang biktima diha sa iyang tiyan ingon man sa liog.

Si Sr. Insp. Albert Quilotorio, deputy chief sa Talisay City Police Station nagkanayon nga nakadawat sila og tawag human sa pagkakita sa usa ka mananagat sa patay’ng lawas sa biktima nga naglutaw sa dagat.

Sa gihimo nila nga imbestigasyon ilang nasayran nga si Lastimosa nianang nakalabay nga gabii gikatahong nasakpan nga nisuway og lugos sa usa ka bata diha sa maong lugar.

Matud pa nga adunay mga tawong nagtinabangay paggukod kaniya. Apan paglabay sa pipila ka oras nakit-an na lang ang lawas niini nga patay na.

Nagduda si Sr. Insp. Quilotorio nga posible nga may kalambigitan sa gihimo sa biktima ang motibo sa pagpatay kaniya.

Apan iyang giklaro nga bukas gihapon sila sa tanang posibilidad tungod kay ang biktima bag-ohay lang nakagawas sa prisohan tungod sa pagpatay sa usa ka naila lang sa pangalan nga “Eddie.”

Samtang usa ka lalaki usab ang nakit-ang patay sa may labong nga kanipaan sa Barangay Cogon West, Lungsod sa Carmen .

Si Senior Police Officer 4 Danilo Laurente sa Carmen Police Station miila sa maong patay’ng lawas nga  mao si  Ryan Estenzo Noro nga taga Sitio Malbago, Barangay Luyang sa maong lungsod.

Matud pa ni Laurente nga ang mga opisyales sa barangay nagduda nga gilabay lang sa ilang dapit ang patay nga lawas.

Wa usab sila makasiguro kun iya ba sa biktima ang usa ka kalibre .357 nga dunay mga bala nga napalgan dili layo sa gikahimutangan sa lawas sa biktima.

Gipaabot pa sa kapolisan ang mga kabanay ni Noro kun ilaha ba kining ipaawtopsiya.

(BANAT NEWS)