Alvin Dizon gihatagan og katungdanan sa City Hall
CEBU, Philippines - Gitudlo ni Mayor Tomas Osmeña si kanhi Cebu City councilor Alvin Dizon isip iyang consultant ug molingkod nga tsirman sa Sister City Commission ug Anti-Discrimination Commission.
Nagkanayon si Osmeña nga aktibo kaayo si Dizon sa Sister City establishment, lakip na sa pagkuha og mga proyekto nga makatabang sa siyudad. Gani matud sa mayor nga si Dizon mitrabaho sa ilang biyahe sa Haarlemmermeer ug Belgium.
Gawas niini aktibo usab si Dizon sa Anti-Discrimination Commission ug gusto ni Osmeña nga ang kagamhanan mapaduol sa katawhan. Magsugod si Dizon sa iyang trabaho kun mahimo na nga majority bloc ang Bando Osmeña Pundok Kauswagan(BOPK) diha sa City Council.
Hatagan og prayoridad ni Dizon ang pagpadayon sa pagpalambo sa partnership sa Sister City sa ubang kanasuran ug kining paghingusog sa Anti-Discrimination nga balaod.
Ang siyudad dunay 15 ka Sister City aggreements gikan sa nagkalainlaing lugar sama sa Europe, US, Canada, China, South Korea ug Australia.
Mapasigarbuhon si Dizon sa oportunidad nga gihatag ni Osmeña aron nga maserbisyuhan niya ang mga Sugbuanon isip usa ka consultant, bisan og dili na siya konsehal.
Nagpasubli unta si Dizon pagka konsehal sa dakbayan kaniadtong miaging piniliay, apan wala siya makadaog. (BANAT NEWS)
- Latest