Ambulansya wa ipagamit?

CEBU, Philippines - Gipaubos og preventive suspension ang hepe sa Minglanilla District Hospital human giingong wala motugot pagpasakay sa usa ka pasyente nga biktima sa hit and run niadtong milabay’ng kaadlawon diha sa Barangay Tunghaan lungsod sa Minglanilla.

Si Gobernador Hilario Davide, III mibutyag nga gipaubos na sa preventive suspension sukad kagahapon si Dr. Bella Villaganas samtang maghimo og imbestigasyon tungod sa insidente.

Matud ni Davide nga dili pwedeng balibaran ang nanginahanglan og tabang tungod kay ang tambalanan gitukod alang sa pagluwas og kinabuhi.

Subay niini, ang hepe sa Provincial Health Office (PHO) Dr. Rene Catan nagkanayon nga samtang gipaubos sa preventive suspension si Villaganas temporaryong ipuli sa iyang posisyon si Dr. Ian Ginald. Usa ka “Marvey Bastida CaNo” ang mi-post sa Facebook tungod sa usa ka tawo nga nabiktima sa hit and run. Ang biktima buhi pa kay naglihok pa.

Namalihog ang polis  og tawo nga moadto sa Minglanilla District Hospital aron magkuha og ambulansya apan giingong gibalibaran  kay dili kini ipagamit  pag-rescue tungod kay “hospital to hospital” lang ang gamitan niini. Giingong ang maong sistema maoy gihatag nga instruction sa Kapitolyo apan ang gobernador mihimakak niini.

Ang mga polis na maoy mikarga sa biktima sa ilang patrol car ug gihatud diha sa nahisgutang tambalanan apan gideklara sa doktor nga patay na ang biktima. (BANAT NEWS)