Mandaue City hapit na mahimong Lone District
CEBU, Philippines - Wala’y problema ang mga mayor sa Lungsod sa Consolacion ug Cordova sa tinguha nga mobulag sa sixto distrito ang Dakbayan sa Mandaue.
Gipahibawo ni Gobernador Hilario Davide, III nga niadtong Martes, gidungog na sa Committee on Local Government ang balaudnon nga giduso ni 6th District Representative Jonas Cortes nga himoong lone congressional district ang Mandaue City.
Ang maong hearing, gitambongan nila ni kanhi mayor sa Lungsod sa Cordova ug karon Presidential Legislative Liaison Office Secretary Adelino Sitoy, Cordova Mayor Mary Therese Sitoy-Cho, Consolacion Mayor Teresa Alegado ug uban pang opisyal sa nahisgutang mga lungsod.
Matud ni Davide, wala’y problema ang maong mga opisyal bisan pa man nga kun ma-lone district na ang Mandaue, ang Cordova ug Consolacion na lang ang mahabilin sa sixto distrito.
Dugang sa gobernador nga dugay nang gitinguha nga mahimong lone district ang Mandaue gani na unhan kini sa Lapu-Lapu City nga kaniadto sakop sab sa ikaunom nga distrito.
Alang niya nga angayan nang mahimong distrito ang Mandaue kay highly urbanized city na kini, daku og populasyon ug daghang negosyo o kompaniya nga nagbase sa siyudad. Gani gikonsiderar kini nga industrial capital sa lalawigan.
Daku ang pagsalig ni Davide nga makabarog ra ang duha ka lungsod kay nagpadayon naman sab kini sa paglambo. (BANAT NEWS)
- Latest