Iskolar sa 4Ps topnotcher sa LET Exam
Gaballo Hulagway kuha ni Mary Grace Baoy
CEBU, Philippines - Nag-inusarang Sugboanon nga nakasulod sa Top Ten sa Licensure Examination for Teacher 2017 ang iskolar sa Pantawid Pamilyang Pilipino Program nga nagtungha sa Cebu Normal University.
Nakuha ni Ronaldo Calbonero Gaballo ang ikanapulong pwesto sa Top 10 sa LET sa bag-ohay lang gipagawas nga resulta sa pasulit nga gihatag niadtong Marso 2017.
Si Santico nga lumad nga taga Badian ikaupat sa walo ka anak sa magtiayong Sabiniano ug Ginanita Gaballo.
Ang mga ginikanan ni Ronaldo mga mag-uuma ug maoy nikamang pagpatungha kaniya.
Apan bisan pa man sa ilang kabutang migradwar siya nga cum laude niadtong Marso 2016 sa kursong BSED Mathematics sa CNU.
Miangkon siya nga naglisod gyud siya sa pagtungha ug gani diha pay higayon kaniadto nga nadala siya sa mga barkada ug nagbugoy-bugoy apan nagpasalamat siya nga nakaamgo siya nga moseryoso sa pag-eskwela.
“Kung naa kay hardwork, naa jud kay makuha. Tuon ug salig sa Ginoo,” tambag pa niya sa mga estudyante.
Apan wala siya makalimot pagpasalamat sa iyang mga ginikanan ug ilabi na sa iyang maguwang nga si Rosalinda nga misuporta sa iyang pag-eskuyla.
“Hangtod karon wa gihapon sila kahibaw nga nakapasar ug naapil ko sa top 10 kay wala’y signal sa Badian ron,” tubag ni Ronaldo kinsa hangtud karon wala magdahum nga masud siya sa top ten. (BANAT NEWS)
- Latest
