P1M shabu nasakmit

CEBU, Philippines – Kapin  P1 milyon nga kantidad sa shabu ang nasakmit sa mga operatiba sa Talisay City Police Station atol sa buy-bust operation nga nahitabo diha sa Talisay City Fish Port sa may South Road Properties (SRP) sa Barangay Tanke, niadtong Sabado sa gabii.

Ang dinakpan mao si Cristan Cabucal alyas Istan, 32, taga Sitio Kamagong, Barangay Lahug, Siyudad sa Sugbu.

Si SPO1 Jeffrey Diola sa Talisay City Police Station nibutyag nga nilutaw ang pangan sa suspek human sa ilang pagdakop niadtong pipila ka mga durugista.

Nisumbong kini kanila nga si Cabucal maoy ilang kuhaanan og drugas hinungdan nga gihimoan nila kini og plano kun unsaon pagsikop.

Hangtud nga nakontak nila ug nisugot nga mobaligya og 100 gramos nga shabu sa kantidad P700 mil.

Gamit ang P500 uban sa budol money ilang napalitan og shabu ang suspek hinungdan nga ila kining nadakpan.

Nakuha gikan kaniya ang 90 gramos lang nga shabu apan kini gibanabanang nagkantidad na og moabot sa P1 milyon.

Sa lain nilang operasyon nadakpan ang managsuong tigpayuhot og ilegal nga drugas nga sila si Robelyn Mangaron alyas Belen, 36 , ug Mavin Mangaron alyas Bitok, 30, nga parehong nagpuyo sa Sitio Suba sa mao gihapong barangay.

Matud ni Diola ang ilang target mao gyud si Robelyn nga maoy gitug-an kanila sa mga nitawag sa ilang buhatan bahin sa pagpamaligya niini og drugas diha sa ilang lugar.

Matud pa nga atol sa pagsikop kang Robelyn ilaha usab nakita si Bitok nga nagsuyop anang tungora.

“Bisa’g naa na mi sa sulod sa ilang balay gipadayon gihapon ni Bitok ang iyang gisuyop,” asoy pa ni Diola.

Si Robelyn ang nakuhaan og tulo ka medium pakete sa shabu samtang tulo ka gagmay’ng pakete gikan sa iyang igsuon. /EIM (BANAT NEWS)