Davide naguol sa pagkataktak ni Sueno
CEBU, Philippines - Naguol si Gobernador Hilario Davide, III sa pagkataktak sa kanhi kalihim sa Department of Interior and Local Government nga si Ismael “Mike” Sueno.
Nagtuo ang gobernador nga posibleng nabiktima sa pamolitika sa DILG ang kanhi kalihim kay bisan sa mubong panahon nga sila nagkaila, iya kining gihulagway nga tarong kining pagkatawo.
Sa pagkalagpot ni Sueno sa katungdanan, adunay mga mitumaw nga taho nga si kanhi Senador Bongbong Marcos ang ipuli kaniya sanglit suod kini sa presidente.
Nasayran nga ang tigpamaba sa presidente nga si Ernesto Abella mibutyag nga si Sueno gitaktak sa katungdanan kay wala nay pagsalig kaniya ang presidente.
Giingong ang pagkataktak sa kalihim magsilbing pasidaan ngadto sa ubang opisyal sa gobiyerno nga seryoso ang presidente sa iyang tinguha nga mabalik ang pagsalig sa katawhan sa gobiyerno.
Si Sueno gipasanginlan nila ni DILG Undersecretaries John Castriciones, Jesus Hinlo ug Emilie Padilla nga nalambigit sa korupsiyon. Apan ang maong pasangil gihimakak sa nataktak nga kalihim. (BANAT NEWS)
- Latest