Banat ( Leaderboard Top ), pagematch: 1, sectionmatch: 1

Mga mitahan kinahanglan og DOH certification

CEBU, Philippines - Mga drug surrenderer kinsa napaubos sa community based treatment program, dili makakuha og vocational courses sa Technical Education and Skills Development Authority (TESDA) kun wala sila’y certification gikan sa Department of Health (DOH).

Ang hepe sa Cebu Provincial Anti-Drug Abuse Office (CPADAO) Carmen Remedios Durano-Meca mibutyag nga ubay-ubay na ang mga drug surrenderer sa probinsiya ang nahuman na sa ilang community based treatment program.

Lakip unta sa maong programa ang pagtudlo og mga livelihood sa mga drug surrenderer diin ang TESDA maoy motudlo.

Matud ni Meca nga ipaubos pa sa evaluation ang mga nahuman kun nakapasar ba sila sa standard sa framework sa DOH. Giingong ang dili makapasar, dili mahatagan og certification sa DOH ug kun walay certification dili usab sila maka-enroll sa TESDA.

Gibutyag ni Meca nga sa Lungsod sa San Remigio, mokabat sa 800 ka drug surrenderer ang mipaubos sa maong programa apan katunga lang sa maong gidaghanon ang nakapasar ug nahatagan og certificate sa DOH.

Ang lokal nga kagamhanan sa San Remigio nakig-coordinate karon sa CPADAO aron sila matabangan alang sa mga wala makapasar.

Matud usab ni Meca nga ang San Remigio pa ang gi-assess sa DOH. Ang mga migradwar sa community based treatment program sa mga dakbayan sa Bogo, Naga, Danao, lungsod sa Argao ug uban pang LGU ang naghuwat pa nga ma-asses. (BANAT NEWS)

  • Follow Us: