Tommy naniudto sa Ermita

CEBU, Philippines - Nibisita ug naniudto sa Barangay Ermita si Cebu City Mayor Tomas Osmeña uban ang mga konsehal nga sakop sa Bando Osmeña-Pundok Kauswagan (BOPK) kagahapon sa udto.

Nideretso sila sa barangay complex diin naghuwat ang ilang mga tigpaluyo lakip na ang giandam nga pagkaon alang sa paniudto.

Apan nabantayan nga gawas sa barangay secretary nga si Erwin Peñafort dili kompleto ang mga barangay workers nga nipatim-aw.

Matud sa barangay secretary nga welcome si Osmeña sa pagbisita sa Ermita apan pagbuot sab sa mga barangay workers ang wala pagtambong.

Gipaabot nila sa mayor ang ilang mga problema sama sa sweldo ug bayronon sa tubig ug kuryente sa barangay kay gikabalak-an nila nga maputlan kay wala na kabayad sulod sa duha ka buwan.

Si Concepcion Misa, 71-anyos ug dumadapig sa BOPK, nihangop sa pagbisita ni Osmeña sa ilang barangay tungod kay tagsa ra mahitabo nga bisitahon sa mayor ang Ermita.

Sa iyang bahin, wala igsapayan ni Osmeña nga gamay ra ang tawo nga nitambong sa iyang pagbisita dungan sa pag-ingon nga ang tumong niya mao ang pagsusi sa kahimtang sa barangay ilabi na nga taud-taud na sab nga wala siya kaduaw.

Isip kabahin sa disciplinary measures nga ipatuman, iyang gimanduan ang caretaker nga si Atty. Winifredo Orcullo nga ang mga empleyado kinahanglang dunay daily time record (DTR) sa ilang trabaho aron maswelduhan.

Motakda og laing schedule si Osmeña aron pakigtagboan ang ubang mga empleyado sa Barangay Ermita.

Si Orcullo niingon nga dili niya mapugos ang mga barangay workers ilabi na karon nga ang ilang simpatiya naa pa sa ilang mga nasuspensong opisyal apan iyang gihimug-atan nga motrabaho lang gyud sila ug kung dunay mga problema dili magpanuko sa pagduol kaniya.

Giangkon ni Orcullo nga dili pa gihapon “cooperative” ang mga tawo sa barangay kaniya ug gani bugnaw gihapon ang tinagdan ngadto niya. (BANAT NEWS)