Incentives sa lupon sunod tuig pa

CEBU, Philippines - Gikatakda nga makadawat sa ilang cash incentives ang mga sakop sa Lupong Tagapamayapa sa kabarangayan sa Probinsiya sa Sugbo sunod tuig pa.

Kini ang gipahibawo ni Gobernador Hilario Davide III niadtong Martes atol sa pagpanghatag og cash incentives sa Lungsod sa Tudela, Poro ug San Francisco sa Isla sa Camotes kuyog ni Bise Gobernador Agnes Magpale.

Apan wala gibutyag sa gobernador kung pila ang cash incentive nga madawat sa mga sakop sa lupon hinuon matud niya nga ang gahin niini nalakip na sa 2017 budget.

Matag tuig ang Kapitolyo manghatag og cash gifts ngadto sa mga barangay health workers, day care center workers, barangay nutrition scholars ug barangay animal health aides sa tag P2,400 ug P1,500 sa mga tanod.

Nikabat sa P2.892 milyones ang kinatibuk-ang pundo alang sa cash incentives nga nahatag sa Kapitolyo ngadto sa 1,442 ka beneficiaries gikan sa nahisgutang tulo ka lungsod.

Sa nahisgutang tulo ka lungsod, ang San Francisco maoy dunay daghang beneficiaries nga niabot sa 699 sunod ang Poro, 463, ug Tudela, 280.

Subay niini, ang Lungsod sa Tudela nakadawat sab og tseke nga nagkantidad og P700,000 isip tabang pinansiyal alang sa construction sa pathway sa Villahermosa Marine Sanctuary ug sa socio-cultural programs. (BANAT NEWS)