Rama negatibo sa drug test

CEBU, Philippines - Negatibo sa urine test sa gihimong drug test si kanhi mayor Michael Rama nga mihagit kang Mayor Tomas Osmeña nga mag one-on-one drug test silang duha kagahapon.

Apan bisan pa man og nagnegatibo si Rama sa iyang urine drug test, dili gihapon kombinsido si Mayor Tomas Osmeña.

Matud ni Osmeña nga wala gihapon mawagtang ang isyu nga drug protector si Rama bisan mipaubos kini og drug test.

Nadayon kagahapon ang drug test sa duha sa managlahing lugar ug oras. Si Rama sa Hi-Precision Diagnostics samtang si Osmeña sa St. Vincent General Hospital.

Matud ni Osmeña nga busy siya kagahapon maong wala siya makatunga sa alas 9 nga gihagit ni Rama sa Plaza Independencia.

“Showbiz ra man na si Rama uy. I have things to do. I’m a busy man. Rama has nothing to do. So he should be the one who will adjust, not me. He has nothing to do,” matud ni Osmeña.

Sigon niya nga adunay posibilidad nga i-tamper or usbon ang resulta sa iyang drug test kun bisa’g asa ra siya magpa-drug test.

Gitawag niya si Atty. Augosto Go, kinsa maoy tag-iya sa hospital nga maoy modala sa iyang hair sample ngadto sa usa ka “competent” nga laboratory.

“Because Augosto Go has a very credible reputation. If I go to a relative or something like that or an appointee of Tommy Osmeña, people will question that.  And you know, I cannot afford to bribe Augosto Go. (katawa),” matud sa mayor.

Matud ni Osmeña nga mas maayong i-clear ni Rama ang iyang pangalan kaysa magsige og pa drug test nga makaandam siya.

Minus singko sa dili pa ang alas-nuwebe sa buntag kagahapon, naabot  si kanhi mayor Michael Rama sa Plaza Independencia Kiosk ug nagpaabot kang Osmeña sulod sa 45-minutos alang sa pagpahigayon sa ilang one-on-one nga drug test apan wala motunga si Osmeña.

Matud pa ni Rama gusto niyang matapos na ang kontrobersiya nga nagsige og hamok kaniya nga usa siya ka adik ug aron sa pagpakita usab nga dili tinuod ang tanan pasangil batok kaniya.

Bisan sa wala pagtunga ni Osmeña mipadayon si Rama pagpaubos sa iyang kaugalingon sa drug test.

Sumala pa ni Rama wala man usab siya maglaom nga motambong si Osmeña sa iyang hagit hinungdan nidesider siyang molakaw ug nagpaubos sa drug test nga nag-inusara.

Duha ka matang sa drug test ang gipahigayon kang Rama ang pagkuha og ihi ug sa buhok ug gipaabot nga sa sunod semana pa mogawas ang resulta.

Dugang pa ni Rama, andam niya dawaton tanan mga hagit batok kaniya may kalabutan sa isyu nga siya tiggamitan og ginadili nga drugas, tungod kay gikapoy na siya og sige og paminaw niini. (FREEMAN)