Bana, kabit gipadakop

CEBU, Philippines - Usa ka bana ug ang giingong kabit niini ang gidakop diha sa Purok Beauty in the Sky, Brgy. Babag Dakbayan sa Lapu-Lapu human nasakpan sa asawa nga OFW nga  sila nag-ipon ug nagkaanak na samtang siya nagtrabaho didto sa abroad.

Gipugngan lamang sa Banat News ang pangalan sa maong lalaki kinsa naghinol na karon sa rehas sa prisohan human gipadakop sa iyang legal nga asawa.

Nagkanayon si PO2 Maria Filipina Branzuela, imbestigador sa Women and Children Protection Desk sa Lapu-Lapu City Police Office- Station 3 nga ang legal nga asawa niini, usa ka OFW sa Hong Kong.

Matud pa niya niduol sa barangay ang ginang aron ipadakop ang bana human nga iyang nakompirmar ang impormasyon sa iyang amiga nga nakit-an ang iyang bana sa tambalanan diin kini manganak.

Ang amiga sa ginang nisumbong nga ang bana sa reklamante didto usab sa maong tambalanan kay nanganak ang “babaye” niini, dihang iyang giadto naabtan gyud niya ang bana ug iyang gikomprontase apan gilihay-lihayan hinuon siya niini.

Nasayran usab sa ginang nga silingan ra nila ang bag-ong babaye sa iyang bana.

"Gidakop ni sila sa barangay tanod...ang kining iyahang bana ug ang laing babaye kay didto ra pud nagpuyo sa iyahang ugangan, bali mama sa lalaki," matud ni Branzuela.

Dugang ni Branzuela base sa ilahang imbestigasyon nga kaniadtong tuig 2010 pa kini nangabit ang bana human mi-abroad ang reklamante.

"She found out nga ang iyaha diay’ng husband naa pud lain dinhi. Ni-exert gyud siya’g effort nga makaestorya ang iyahang husband and then ang babaye naman ang mo-reply sa iyaha," matud ni Branzuela.

Tungod niini mipauli ang ginang gikan sa Hong Kong niadtong 2013 apan gikatahong wa na mopakita niya ang iyahang bana ug nakadawat na lang siya’g taho gikan sa mga higala niini nga aduna na kini laing kapuyo ug nakaanak na og tulo. Samtang ang magtiayon adunay duha ka anak  matud pang Branzuela.

"Coincidence sad kaayo, nanganak ang iyahang amiga ug ang babaye sa bana in the same hospital. Mao iyaha gi-confront ug gi-confirm didto. Iyahang gitagaan og higayon ang lalaki nga magkaestoryahay sila, di man gyud siya (ang lalaki)," matud ni Branzuela.

Gikatahong nag-inisog ang babaye sa bana ug gi-away ang legal nga asawa hinungdan nga midangop na lang kini sa mga otoridad.

Kagahapon sa hapon, gikasuhan nilang Branzuela ang maluibong bana ug ang babaye niini og concubinage ug Republic 9262 o Violence Against Women and Children sa Lapu-Lapu City Justice Hall. Mao na kini ang ikaduhang insidente sa pagpangabit nga nahitabo sa siyudad sud sa tulo ka adlaw.

Ang unang insidente nahitabo sa miaging Domingo sa gabii diin nasakpan usab sa asawa nga dunay laing kakuyog nga babaye ang bana niini sulod sa usa ka motel sa Brgy. Buaya.

Matud ni Police Chief Inspector Wayne Magbanua, hepe sa LCPO- Station 5 nga ang bana ug ang kabit gikasuhan na usab og concubinage ug Republic 9262. (BANAT NEWS)