Habal-habal i-regulate

CEBU, Philippines - Usa ka konsehal sa Dakbayan sa Sugbo nagtinguha nga ma-regulate na ang operasyon sa gitawag og habal-habal.

Si Konsehal Joel Garganera miduso og ordinansahon didto sa Cebu City Council ug gipatun-an na sa mga sakop sa Committee on Laws kun ang pag-aprobar niini dili ba makalapas sa balaod. Nakita ni Garganera ang bentaha kun ang operasyon sa habal-habal ma-regulate na kay ang mga drayber niini dili na magpanghadlok nga madakpan, ug nga makontrolar na sila sa dakbayan.

Plano ni Garganera nga himoan og mga lakang nga ang mga drayber og habal-habal nga anaa sa lainlaing dapit dinhi sa dakbayan himoan og kahugpongan ug pasul-obon gyud og identification cards.

Matud ni Garganera nga kun ma-regulate kini siguroon na gyud nga kadto lang nga adunay driver’s license ang tugotan nga makapamasahero ug kinahanglang rehistrado usab ang ilang mga motor.

Pagkakaron, daghan sa mga drayber og habal-habal mga walay lisensya ug ang uban mga tiggamitan pa og gidiling drugas. Samtang walay statistics kun pila ang tanang habal-habal nga nag-operate dinhi sa dakbayan, apan gibana-bana nga dili kini momenos sa dos mil.

Si Land Transportation Office (LTO) Acting Regional Director Alita Pulga nidayeg sa lakang ni Garganera nga pagpakabana ngadto sa mga drayber og habal-habal.

Apan matud ni Pulga nga bisan pa og adunay ordinansa ang dakbayan sa Sugbo nga mag-regulate niini mahimo gihapon sila nga dakpon sa mga enforcers sa LTO.

Gipasabot ni Pulga nga ang Republic Act 4136, kon Transportation and Traffic Code, wala gayud magtugot nga ang mga motorsiklo mahimong gamiton sa pagpamasahero o kaha masakyan og sobra sa duha ka tawo.

Gisugyot ni Pulga nga kun gusto gyud sa mga opisyal nga himoong legal ang operation sa mga habal-habal mas labing nindot kun awhagon nila ang Kongreso nga himoan nila og kausaban ang Republic Act 4136.

Matud ni Pulga nga kinahanglang ilatid sa balaod nga ang motorsiklo mahimo na nga gamiton sa pagpamasahero. (BANAT NEWS)