Dili tanan seryuso sa quake drill

CEBU, Philippines - Dungan nga gihimo ang earthquake drill sa mga kawani sa Talisay City Hall pinanguluhan ni Mayor Eduardo Gullas, publikong tunghaan ug ubang establisemento kagahapon sa buntag.

Namatikdan ni Gullas nga daw dili perpekto ang ilang gihimo apan para niya maayo kini nga buluhaton aron sila mahibawo nang daan kun unsaon nila sa pag-react kung aduna gyuy tinud-anay nga panghitabo sama sa linog.

Siya nagkanayon nga ang ilang nakat-onan posible nga mao kini ang makatabang kanila sa pagluwas sa ilang kaugalingon kun makasinati gyud og katalagman.

Naobserbahan sab sa mayor nga daw dili seryuso ang mga kawani sa ilang gihimo tungod kay sa dihang nitingug na ang alarma timailhan nga adunay linog ang ubang kawani ang wala nitago ilawom sa lamesa nga daw wala ray nahitabo. Apan aduna gyuy mga empleyado nga giseryuso nila ang maong kalihukan sama sa paglukdo sa ilang mga kamot.

Samtang si Alvin Santillana, pangulo sa City Disaster Risk Reduction and Management Office, niingon nga nasulod sa ilang target nga kwatro minutos ang paggawas sa mga kawani.

Siya nitataw nga sa sunod drill, hayan ilang ilhon ang ubang mga agianan aron adto na moagi ang ubang kawani aron dili  maghuot. (BANAT NEWS)