Magpataka og parking sa Talisay pangdakpon

CEBU, Philippines - Naglaraw ang kagamhanan sa dakbayan sa Talisay nga mokuha sa serbisyo sa pribadong towing company aron maoy mohipos sa mga sakyanan nga giparking sa mga walay disiplinang drayber.

Ang pangulo sa City of Talisay-Traffic Operation Development Authority (CT-TODA) nga si Hiram Binatero nitug-an nga sa ilang obserbasyon, daghan nga mga drayber ang niabusar ug nagpataka lang og parada sa ilang mga sakyanan.

Hinungdan nga nagtigum ang CT-TODA council ug ilang girekomendar ngadto kang Mayor Eduardo Gullas nga mosulod og kontrata sa pribadong towing company.

Ang maong plano ila usab gisumiter sa konseho dungan sa paghangyo alang sa maong katuyuan.

Matud ni Binatero nga kadtong mga gagmay nga mga sakyanan nga pataka lang og parking, sayon ra nilang maguroy ilabi na og muabot na ang ilang gihangyo nga multicab sa mayor alang sa ilang buhatan. Ang maong lakang makatabang unya sa pagpakunhod sa trapiko sa dakbayan.

Dugang niini nga niining higayona, ilang ipaubos sa insaktong proseso ang pagkuha og serbisyo sa pribadong towing company aron dili mahisama sa niaging administrasyon nga gibato og daghang pagsaway kay wala kini moagi sa konseho. (BANAT NEWS)