2 minors, laing 12 sikop sa drugas

CEBU, Philippines - Nasikop sa managlahing buy-bust operation ug saturation drive ang siyam ka tawo kinsa duha niini mga minor de edad sa nilabay’ng gabii sa Dakbayan sa Sugbo.

Unang nasikop nga naaktuhan nga naggamit og ilegal nga drugas mao si Jepoy Caballero, 22, taga Tres de Abril ug Christopher Gaballo, taga V. Aranas, Calamba.

Ang duha nasikop sa mga sakop sa Mambaling Police Station atol sa saturation drive sa Barangay Duljo Fatima.

Laing pito ang nasikop sa hiniusang operasyon sa kapolisan sa Mabolo Police Station kinsa usa sa duha ka minor de edad babaye.

Ang mga nasikop naila nga sila Manuel Castillano, 31; Sergio Aguipo, 35; Justiniano Dollan, 39; Narciso Tumulak, 43; Utemio Belarmino ug duha ka 17-anyos pa nga lalaki ug babaye.

Ang mga dinakpan nasikop atol sa buy-bust operation nga gipangulohan ni Police Chief Inspector Jacinto Mandal Jr. sa San Isidro, Barangay Mabolo.

Matag dinakpan nakuhaan og pipila ka putos sa gituohang shabu.

Ang minor de edad nga lalaki niangkon nga iya ang calibre .38 nga armas nga gipaayo sa iya sa tag-iya nga naa sa prisohan.

Lakip sa iyang giangkon ang paghupot sa ilegal nga drugas nga mapalit niya sa tag P200 matag putos ug nagsugod siya sa paggamit sa nag-edad pa siya og 15-anyos.

Nagmahay ang batan-on dungan ang pagpangayo og pasaylo sa iyang mga ginikanan.

Sa laing bahin nasakmit sa kapolisan ang shabu ug armas de fuego gikan sa usa ka tawo nga nag-angkas sa motorsiklo kinsa kalit lang niambak sa paglabay sa checkpoint sa H. Cortes Avenue, Subangdaku, Dakbayan sa Mandaue alas 11 pasado sa niaging gabii.

Si Senior Police Officer 3 Dindo Montesclaros sa Presinto 2 sa Mandaue City Police Office (MCPO) niila sa nadakpan nga si Jomar Arriesgado, 24, ulitawo nga taga Kasambagan, Dakbayan sa Sugbo.

Matud ni Montesclaros nga wala nihunong ang motorsiklo dihang kalit niambak si Arriesgado hinungdan nga gitabangan og gukod nilang PO1 Macluie Dabon ug PO1 Marso Zaspa ug nasikop.

Dihang girekisa, nakuha gikan sa dinakpan ang kalibre .22 nga armas ug duha ka gagmay nga pakete sa gituohang shabu.

Ang dinakpan niingon nga wala siya kaila sa nagmaneho sa habal-habal nga motorsiklo nga iyang gisakyan ug magpahatud unta siya sa ilang panimalay sa Dakbayan sa Sugbo.

Samtang gitanggong sa bilanggoan  ang upat ka tawo nga nasikop sa buy-bust operation sa Riverside 1, Cansojong, Dakbayan sa Talisay niadtong Lunes sa gabii.

Ang mga gisikop mao sila si Jason Abellana, 22; Fernando Bucao, 44; Kent Aliño, 25 ug Joel Sonsona, 45, pulos nagpuyo sa nahisgutang lugar. Ang kapolisan nga pinangulohan ni Supt. Aileen REcla ang nihimo sa operasyon batok ni Abellana human ilang nasuta nga kini nagbaligya og ilegal nga drugas.

Matud ni PO1 James Cabrillos sa Talisay City Police Station nga wala pa malakip sa ilang watchlist si Abellana tungod kay bag-o lang kini sa negosyo.

Nakuhaan og siyam ka pakete sa ginadiling drugas ang mga dinakpan. (BANAT NEWS)