18 nitahan sa Tabogon

CEBU, Philippines - Nitahan sa Tabogon Police Station ang 18 ka tawo nga niangkong tiggamitan og shabu sa nagpadayong Oplan Tukhang nga gihimo sa kapolisan kagahapon sa buntag.

Si Police Officer 3 Eulogio Bughaw sa Tabogon Police Station niingon nga ang mga nitahan kabahin sa mokabat usa ka libo ka users ug pushers sa lungsod.

Matud ni Bughaw nga gawas sa pagkuha sa ilang tagsa-tagsa ka detalye sa ilang pagkatawo, gipapirma sab sila sa panaad sa paghunong na sa dautang bisyo.

Gitataw ni Bughaw nga sa ilang dapit wala pa mahitabo nga adunay pusher o user og shabu nga nakalas sa operasyon sa kapolisan o sa riding in tandem. (BANAT NEWS)