Gullas nibilib sa hepe

CEBU, Philippines - Nibilib na si Talisay City Mayor Eduardo Gullas sa hepe sa kapolisan sa dakbayan nga si Supt. Aileen Recla.

Kini human si Recla ang nakadawat og pasidungog isip best top performer nga hepe sa pagpakigbatok sa ilegal nga drugas.

Gawas niini si Gullas nakakita mismo sa gipakitang labok ni Recla sa natad sa pagpatuman sa ilang hugot nga kampanya batok sa ginadiling drugas.

Apan bisan pa man sa maong kalambuan giklaro ni Gullas nga wala gihapon siya’y plano nga iyang himuong permanente nga hepe si Recla.

Siya niingon nga dili lang sab siya mangayo og lista sa Cebu Provincial Police Office (CPPO) sa mga opisyal nga mahimo niyang pilian isip hepe.

Matud ni Gullas nga natagbaw siya sa gipakitang labok ni Recla hinungdan nga dili lang una siya mangayo og laing mga pangan sa mga opisyal sa kapolisan.

Asoy pa ni Gullas nga dili angay nga mo-relax si Recla tungod kay gusto pa niya nga magpadayon ang iyang binuhatan sama sa pagpangulo sa iyang mga sakop sa mga operasyon.

Gimanduan sab ni Gullas si Recla sa paghimo og police visibility tungod sa nahitabong pagpamomba sa Siyudad sa Davao.

Naglakip na ang iyang kamanduan sa nagsingabot nga kapistahan ni Sta. Teresa de Avila diin iyang gihulagway nga daghan na usab ang mga tawo nga magtapok sa usa ka lugar tungod sa mga kalihukan may kalambigitan sa kapistahan. (BANAT NEWS)