Insentibo alang sa mga atleta giduso sa konseho

CEBU, Philippines - Gisang-at ngadto sa Committee on Laws ug Committee on Budget and Finance sa konseho sa dakbayan sa Sugbo ang ordinansahon nga maghatag og cash incentives ngadto sa mga atleta ug coaches nga taga siyudad sa Sugbo kun ugaling mahimo silang medalists sa apilan unya nilang paugnat sa kusog.

Ang maong ordinansa gipangamahanan ni Konsehal Jerry Guardo kinsa maoy chairman sa Youth and Sports Development Committee. Base sa iyang ordinansa, ang Olympic gold medalist hatagan sa dakbayan og usa ka milyon ka pesos; makadawat og P500 mil ang silver medalist samtang P300 mil ang bronze medalist.

Sa SEA games, ang gold medalist makadawat og P150 mil; P100 mil ang silver medalist ug P50 mil alang sa bronze medalist.

Hatagan usab ang mga medalist sa ASEAN Games diin P300 mil ang madawat sa gold medalist, P200 mil ang sa silver medalist ug P100 mil sa bronze medalist. Makadawat sa maong cash incentive mao kadtong mga rehistrado ug inilang manunuwa sa City’s Sport Commission, residente sa siyudad ug usa ka Filipino citizen.

Gisaysay usab sa maong ordinansa nga 30 porsiyento sa madawat nga cash incentives sa atleta, mapunta ngadto sa ilang coach.

Kun ugaling team o grupo ang makadaug, tungaon sa matag miyembro ang kantidad sa kwarta.

Ang maong lakang ni Guardo, nag-awhag sa mga manuwaay nga ipakita ang ilang kapasidad sa paglangkat og kadaugan nga makahatag og dungong sa siyudad. (BANAT NEWS)