Biktima sa sunog namaligya’g shabu

CEBU, Philippines - Gitanggong karon sa sulod sa detention cell sa kapolisan sa Presinto 1 sa Mandaue City Police Office (MCPO) ang usa sa mga biktima sa sunog nga temporaryong nagpuyo sa evacuation camp sa Cebu International Convention Center (CICC) human kini masikop sa buy-bust operation nga gihimo alas 9 pasado ang takna sa miaging gabii.

Si Senior Police Officer 4 Theodore Fuentes sa Presinto 1 sa MCPO miila sa dinakpan nga mao si Leonardo Ylanan  Mapait, 40, lumad nga taga Libertad, Dakbayan sa Bogo ug temporaryong nagpuyo sa CICC.

Matud pa ni SPO4 Fuentes nga nakadawat sila og mga taho labot sa tago-tago nga pagpamaligya og drugas sa maong suspetsado sa nahisgotang lugar hinungdan sa gihimong buy-bust operation hinungdan sa pagkasikop niini. Samtang unom ka tawo ang nadakpan sa kapolisan sa Dakbayan sa Talisay sa managlahing operasyon nga gihimo diha sa Sitio Salvador, Brgy. Tanke ug sa Ramona Village, Brgy. San Isidro.

Sa Tanke, nakaipsot ang target nga si Jessmar Gaviola alyas Tangkag, 34, apan gidakop ang iyang asawa nga si Jeanalyn Gaviola alyas Ping, 34, human gikatahong nibabag sa mga polis nga modakop unta sa iyang bana.

Matud pa gipalitan unta og shabu si Jessmar apan dihang dakpon na human nitunol sa drugas nakabantay si Jeanalyn ug gipugngan ang mga polis hinungdan nga nakadagan palayo si Jessmar. Gisikop si Jeanalyn ug nakuhaan og tulo ka dagko nga pakete sa shabu.

Sa laing operasyon diha sa Brgy. San Isidro, nadakpan sa grupo ni Supt. Aileen Recla si Joseph Belleza, 40, nga giingong namaligya og shabu sa maong lugar ug nakuhaan og upat ka dagko ug medium pack nga shabu.

Nasikop usab sila si Lengerbert Nacua, 42; Edgar Enajada, 47; Alexander Paran, 32; ug Randal Naardo, 29, nga nakuhaan og 12 ka gagmay nga paketeng shabu nga giingong ilaha untang suyopon. (BANAT NEWS)