Karaang bomba nakuykoyan

CEBU, Philippines - Usa ka vintage bomb nga gituohang panahon pa sa Ikaduhang Kalibutanong Gubat ang nakuykoyan kagahapon sa buntag sa usa ka luna nga tukoran og usa ka shopping center dili layo sa Cebu South Bus   Terminal.

Matud pa ni Jessy Mesina, ang back hoe operator nga nakaukal sa bomba nga nahinabi sa Banat News niadtong Lunes sa hapon aduna siyay naigo nga gahi nga butang samtang nagkubkob.

Tungod kay gahi ug daw bug-at kaayo iyaha kining gitan-aw ug tungod sa iyang kalibog gihunong niya ang pagkubkob.

Kagahapon sa buntag mibalik siya aron ipadayon ang pagkubkob ug gialsa niya kini pinaagi sa backhoe apan sa dihang iyang gipakiskisan sa iyang kauban  nakurat sila sa iyang kauban kay ang hitsura niini usa man ka dakong bomba.

Diha na nanimbawot ang iyang balahibo tungod kay posibleng nibuto kadto samtang iyaha kining gikubkob kay makadaghang higayon niyang naigo sa scoop sa back hoe ang maong bomba hinungdan nga dali silang nangayo og  tabang.

Ang pangulo sa Cebu South Bus Terminal Joey Herera, nitug-an sa Banat News nga usa sa mga nagdumala sa maong gitrabahong construction site ang niduol sa iyaha ug nagpakitabang kini kung unsay ilang buhaton sa maong gidudahan nilang bomba.

Dali silang mitawag sa polis sa Carbon Police Station nga nadestino pagbantay sa terminal ug mao nay nitawag sa Special Weapons and Tactics.

Ang kapolisan padayon pang nisusi kun unsa kini nga matang sa bomba apan adunay mga pagduda bomba kini nga ihulog sa mga abyon o “drop bomb” kaniadto panahon sa gubat. (BANAT NEWS)