PO3 Inot ug ig-agaw nitahan

CEBU, Philippines - Mitahan kagahapon sa udto si Police Officer 3 Renato Inot ug ang iyang ig-agaw nga si Adelcos Alonzo diha sa Mandaue City Police Office human sa tulo ka adlaw nga wala kini nagpakita.

Nagkanayon si Police Superintendent Bernouli Abalos, hepe sa MCPO- City Intelligence Branch nga si Inot mikontak kaniya Lunes sa gabii ug nagpakuha sa lungsod sa Medellin, Cebu.

Didto sa Medellin si Inot tungod duna kini tambongang court hearing sa Bogo City kagahapon sa buntag apan iyaha kini gikanselar aron sa pagtahan sa MCPO.

Matud ni Police Senior Superintendent Roberto Alanas, director sa MCPO si Adelcos kasohan og illegal possession of firearms, grave threats ug physical injuries, samtang kasong administratiba ang kang Inot.

Si Inot sa iyang bahin miingon nga wala siya nagtago-tago apan kinahanglan niyang mopatim-aw kay nabalaka na iyang pamilya. Si Mayor Luigi Quisumbing nagpasalamat nga nasulbad na ang isyu ug misaad sa mga Mandauehanon nga pabiling luwas ang siyudad. Gipasalamatan usab niya ang mga netizens nga aktibo sa social media nga mi-post sa insidente. (BANAT NEWS)