Tahong gikan R8 di gihapon ipakaon
CEBU, Philippines - Gipugngan pa gihapon nga makasulod sa Sugbo ang mga tahong nga gikan sa Eastern Visayas kay positibo gihapon kini sa red tide.
Mao ni ang gitug-an ni Alma Saavedra, ang tigpamaba sa Bureau of Fisheries and Aquatic Resources Regional Office 7 (BFAR 7).
Dugang ni Saavedra nga negative ang kadagatan sa Rehiyon 7 sa red tide apan adunay mga higayon nga nakakonpiskar sila sa kamerkadohan og mga tahong nga positibo niini nga gikan sa Samar ug dali nilang nakuha gikan sa merkado.
Hangyo sa BFAR sa mga konsumidor nga magbinantayon kanunay ug magpangutana kun asa nagagikan ang tahong nga ilang pamaliton. Malaumon si Saavedra nga mosulti sa tinuod ang mga manindahay kun asa gikan ang ilang baligya nga tahong.
Laing gitug-an ni Saavedra nga bisan sa ilang hugot nga kampanya, adunay tahong nga makalusot kay daghang mga entry points nga dili mabantayan, hinungdan nga kanunay ang ilang monitoring sa kamerkadohan.
Gipadayag ni Saavedra nga ang pag-usab-usab sa temperatura maoy usa sa mga hinungdan nga magpositibo sa red tide ang tahong.
Kahinumduman nga dili mominos 70 ka kilong tahong ang nasakmit sa Department of Veterinary Medicine and Fisheries sa nilabay nga mga bulan sa Barangay Pasil dakbayan sa Sugbo kay positibo kini nga gikan sa Eastern Visayas nga adunay advisory nga dili kini mahimong kan-on gumikan sa red tide. (BANAT NEWS)
- Latest