Bacaltos pabiling TCC President

CEBU, Philippines - Giklaro ni Dr. Richel Bacaltos nga pabilin siya’ng presidente sa Talisay City College (TCC) ug dili sa opisina ni Talisay City Mayor Eduardo Gullas.

Kini human nabantayan sa kadaghanan nga halos kada adlaw makita siya sa buhatan sa mayor ug aduna pay kaugalingon nga lamesa.

Asoy pa ni Bacaltos igo lang siya nga gipatabang sa paghan-ay sa pagpadagan sa buhatan sa mayor ug pabilin gihapon siya nga presidente sa TCC.

Gani karong bag-o ang Board of Trustees (BOT) sa TCC nipalabang og resolusyon nga nagtudlo ni Bacaltos isip permanenteng TCC President ilabi na nga kwalipikado gyud siya sa paghupot sa maong posisyon human migradwar sa iyang doctorate degree.

Nahimong kontrobersyal si Bacaltos sa miaging katuigan human si kanhi mayor Johnny V. de los Reyes nipalagpot kaniya sa maong buhatan. Sa paglingkod ni Mayor Gullas gibalik sab sa pwesto si Bacaltos.

Gipasabot ni Bacaltos nga wa gyud siya’y plano sa pagdawat og laing katungdanan samtang ang iyang presensya sa buhatan sa mayor temporary lang ilabi na kun mahan-ay na ang mga tawo nga maoy moatubang ug mutabang sa mga Talisaynon nga aduna’y tuyo sa buhatan sa mayor.

Dugang niya nga bisan pa og naa siya makita sa buhatan sa mayor mudalikyat gyud siya sa pag-adto sa iyang opisina sa TCC kay aduna silay giapas nga accreditation sa Commission on Higher Education nga wala malihok sa miaging administrasyon.  (BANAT NEWS)