‘Tulisan’ nahagba

CEBU, Philippines - Nag-inusarang tulisan nga nanulis sa usa ka tindahan sa may dalan Colon, Cebu City ang walay swerte nga napusilan patay sa off-duty nga pulis nga miresponde human niini nakita ang kasikas sa maong dapit.

Patay diha-diha dayon si Ryan Flores, taga Talamban ning dakbayan apan lumad nga taga Guihulngan, Negros Oriental. Ang nakapusil kaniya mao ang off-duty nga polis nga si Police Officer 1 Gilbert Ybañez Cavajar nga sakop sa Regional Public Safety Battalion (RPSB-7) nga naagi lang sa maong dapit.

Samtang nalandig sa tambalanan si Jordan Dico, 59, ang manager sa usa ka dako nga tindahan sa dalan Colon. Usa ka saksi sa maong lugar kinsa dili buot magpaila sa iyang pangalan, nitug-an sa Banat News nga naglakaw si Dico gikan sa Happy Mart kuyog sa duha ka mga lalaki sa dihang kalit lang gibitad ang sling bag niini sa maong suspek.

Matud pa nga nisukol sa tulisan hinungdan nga kini gipusil makaduha ka higayon ug nahagba, dihadiha nagkatibulaag ang mga tawo.

Maayo na lang nga atol sa kaguliyang naagi usab si PO1 Cavajar kinsa daling miresponde ug nakita niini si Flores aksyon na og biya sa crime scene apan napusilan kini sa maong polis.

Human sa maong insidente dali nga gidala ni Cavajar si Flores sa Cebu City Medical Center apan gideklarar kini sa mga doktor nga dead on arrival samtang si Dico dali usab nga gidala sa tambalanan ug padayon pa nga giatiman.

Matud pa ni Police Officer 2 Rey Dale Sardual, Desk Officer sa Carbon Police Station base sa ilang imbestigasyon posibleng nasuko si Flores ni Dico kay wala niini gihatag ang iyang bag nga gituohan nga adunay sulod nga salapi hinungdan gipusil niini ang biktima.

Gisusi pa nila kun planado ba gyud sa suspek pinaagi sa pagpaniid ni Dico ang iyang gibuhat kay giatol man gyud niya kini pagtulis dihang padung na pauli ang biktima.

Gisubay usab nila ang background ni Flores kun sakop ba kini og robbery gang dinhi sa dakbayan. Nakuha gikan ni Flores ang usa ka kalibre .38 sa armas nga adunay mga bala.

Nakuha usab sa crime scene ang lima ka kabhang sa kalibre kwarentay singko sa armas nga gituohan nga iya ni PO1 Cavajar.

Si PO1 Cavajar ug laing bagitong polis nga nakadakop og armadong riding in tandem ug shabu lakip ang usa ka lady traffic enforcer ang pasidunggan sa Police Regional Office 7.

Gidayeg ni Chief Supt. Noli Taliño silang Cavajar ug si Police Officer 1 Ronie Genardino nga nakasikop og duha ka armadong lalaki.

Sumala pa ni Taliño, angay lamang nga hatagan ug pasidungog ang gipakitang kaisog sa mga polis nga nituman sa ilang gipanumpaang moserbisyo sa   katawhan.

Ang duha ka mga polis hatagan og Medalya ng Kagalingan aron makita sa ubang mga polis nga andam ang PNP moila sa mga polis nga nagtinarong sa ilang panerbisyo.  (BANAT NEWS)