Anak og ex-Mayor gidakop

CEBU, Philippines - Gitanggong karon sa bilanggoan ang anak sa kanhi mayor sa Maasin City, Southern Leyte human kini gidakop sa kapolisan sulod sa usa ka hotel sa Barangay Lorega-San Miguel, dakbayan sa Sugbo kay nakuhaan og shabu ug armas kagahapon sa buntag. Si Roderick James Espina, 54, giingong “bata-bata” sa drug lord nga si Kerwin Espinosa nga anak sa mayor sa Albuera, Leyte apan ang dinakpan abtik nga nanghimakak og kalambigitan sa negosyo sa drugas ni Kerwin.

Gironda sa mga sakop sa Regional Special Operations Group ug Regional Anti-Illegal Drugs Special Operations Task Force (RSOG-RAIDSOTF) ang kuwarto sa hotel sa dalan Echavez nga giestahan ni Espina. Tag P19 mil kada buwan ang bayad ni Espina sa iyang kuwarto sa hotel ug unom ka buwan na siya nga nagpuyo.

Si SPO1 Reynold Solante miingon nga nakadawat sila og taho nga si Espina namaligya og shabu. Nahibaw-an nga lainlaing babaye ang mosulod sa kuwarto ni Espina apan nahibulong ang mga kawani sa hotel kay dili magpalimpyo sa iyang kuwarto ang ilang guest. Usa ka polis nagpatuo nga kawani sa hotel ug dihang nanawag si Espina kagahapon, ang polis maoy miadto ug pagbukas ni Espina sa pultahan nakit-an ang armas ug shabu nga diha sa lamesa mao nga gihimo dayon ang pag-search. Nakuha sa kuwarto ni Espina ang usa ka medium size nga pakete sa shabu, 22 magnum revolver, 45 caliber pistol ug mga drug paraphernalia.

Matud ni Espina nga ania siya sa Sugbo kay giayo pa ang iyang balay didto sa Leyte. Ang kapolisan sa Maasin City miingon nga wala maapil si Espina sa ilang watchlist sa mga drug suspects. Apan usa ka polis nga mihangyo nga dili magpaila miingon nga nakadungog sila og report nga si Espina nalambigit pagpamaligya og drugas apan gikan kaniadtong 2010 wala na igdungog si Espina didto sa Maasin. (BANAT NEWS)