Archdiocese pabor sa imbestigasyon sa EJK
CEBU, Philippines - Niawhag ang tigpamaba sa Archdiocese of Cebu sa nagkadaiyang grupo nga nagpahigayon og imbestigasyon sa giingong extra judicial killings sa pagpadayon niini aron masayran kung nganong nagkataas ang kaso ilabi na sa rehiyon.
Matud ni Msgr. Joseph Tan nga angayan masayran kung unsay hinungdan sa pagpamatay ug kinsa usab ang mga responsable.
"Ang ato lang is to avoid further complications kay we always say it's a principle that we all subscribe to, the end will not justify the means," matud ni Tan.
Gihangop ni Tan ang programa sa Police Regional Office-7 may kalabutan sa ilang taho nga niubos ang crime rate tungod kay sa unang higayon natubag ang problema sa drugas.
Base sa taho sa PRO-7, ang crime volume sa rehiyon niubos gikan sa 31, 482 ngadto na sa 29, 302 diin 6.9 porsiyento ang pag-ubos.
Malaumon usab si Tan nga magmabungahon ang Senate investigation nga nagpadayon ug moguwa ang kamatuoran.
Gipadayag ni Tan nga mas maayo usab nga kadtong mga opisyal nga nalambigit sa kontrobersiya nga dili lang usa manginlabot sa imbestigasyon aron dili maduhigan og mga pagduda.
Gitug-an ni Tan nga dili lang si Senador Leila Delima ang iyang gipasabot apan sa tanang opisyal nga adunay kontrobersiya nga mo-abstain lang una. (BANAT NEWS)
- Latest
