Sakyanan nisilaob sa karsada

CEBU, Philippines - Miabot sa P700 mil ang danyos sa dihang nisilaob ang usa ka sakyanan sa South Road Properties (SRP) habig sa Barangay Lawaan II, dakbayan sa  Talisay kagahapon sa kaadlawon.

Gimaneho ang maong sakyanan ni Hermes Escosung nga taga L36 Villa Feliza sa Barangay Tungkil sa lungsod sa Minglanilla.

Ang maong sakyanan usa ka CRV nga kolor maroon ug gipanag-iya sa anak sa nagmaneho niini.

Matud ni Escosung, gikan sila sa dakbayan sa Sugbo ug paingon na silang mamauli sa iyang asawa sa dihang iyang nabantayan nga ni-spark ang walang bahin nga headlight sa maong sakyanan.

Wala magdugay, nisilaob ang sakyanan hinungdan nga dali silang nanganaug ug nipalayo.

Nagpakitabang sila apan naugdaw ra gihapon ang sakyanan pag-abot sa mga bombero.

Gihulagway sa nag-imbestigar nga bombero nga problema sa linya sa suga ang hinungdan sa sunog ug ilang gibana-bana nga muabot sa P700 mil ang danyos niini.

Wala ray nasamdan o nakalas atol sa maong insidente.  (BANAT NEWS)