Teenage pregnancy ug responsible parenthood, gituki sa youth summit

CEBU, Philippines - Mikabat sa 400 ka mga batan-on gikan sa nagkalain-laing lugar sa probinsiya sa Sugbo ang mitambong sa Provincial Youth Summit diin gi-edukar sila sa paglikay sa teenage pregnancy ug sa pag-promote sa responsible parenthood.

Sa milabay nga adlaw ang maong kalihukan gipahigayon sa dakbayan sa Bogo atol sa pagsaulog sa World Youth Day 2016.

Si Gobernador Hilario Davide III mipakita sa iyang kahingawa sa report gikan sa United Nations Populations Fund nga ang Pilipinas maoy nag-inusarang nasud sa Asia-Pacific Region nga misaka ang gidaghanon sa teenage pregnancies sa milabay nga duha ka dekada.

Gitumbok ni Davide ang pipila ka mga  kaso diin usa ka 12-anyos nga batang babaye nga taga Bogo ang namabdos niadtong tuig 2013 ug usa ka 9-anyos nga batang babaye ang nanganak niadtong tuig 2015 sa Vicente Sotto Memorial Medical Center (VSMMC).

Matud sa gobernador nga ang maong insidente pipila lang sa mga kaso sa teenage pregnancy nga nasinati ug nagpabilin nga dakung hagit dili lang sa gobiyerno apan lakip na ngadto sa tagsa-tagsa ka pamilya.

Ang Provincial Social Welfare and Development Office (PSWDO) uban sa Population Commission (POPCOM) mipahigayon sa maong summit aron paghatag og edukasyon ug saktong kaalam sa mga batan-on kabahin sa teenage pregnancy.

Lakip sa mga miapil sa maong kalihukan ang mga lungsod sa Borbon, Tabogon, San Remigio, Medellin, Daanbantayan, Bantayan, Santa Fe,  Madridejos ug Tabuelan.

Naglakip sa maong summit ang exhibits, Sustainable Development Goals (SDG) Teen Trail, TV advertisement-making contest, infotainment ug mini concerts.

Midaug ang “Karga” sa Cebu Normal University sa TV Ad making Contest. Gisundan kini sa “Inday” sa University of San Jose-Recoletos ug ang “A Good Choice” sa San Remigio National High School.  (BANAT NEWS)