Canyoneering sa Alegria, Badian suspendido pa

CEBU, Philippines - Suspendido gihapon ang canyoneering activity sa Kanlaob River sa Lungsod sa Alegria ug Badian hangtud sa Agosto 31.

Kini gumikan kay dili pa andam ang kagamhanan sa Lungsod sa Badian sa pagpatuman og mga precautionary measures aron malikayan na ang aksidente nga nikalas og kinabuhi sa usa ka tour guide.

Hunyo 1 hangtud Hulyo 30 ra unta ang pagsuspenso apan matud ni Alegria Mayor Verna Magallon nga si Gobernador Hilario Davide III niluwat sa Executive Order No. 8 alang sa lugway sa pagsuspenso sa canyoneering hangtud Agosto 31.

Ang canyoneering adventure site nahimutang sa Barangay Compostela, Alegria ug Barangay Matutinao, Badian.

Gibutyag ni Magallon nga ang mga opisyal sa Badian maoy nihangyo sa lugway aron sila makaandam gyud sa angayang andamon sa canyoneering.

Matud ni Baltazar Tribunalo, pangulo sa Provincial Disaster Risk Reduction and Management Office, nga daghan pa og kulang ang Badian.

“In so many aspects, like business plan, emergency response plan unya sa ilang team sa tour guiding pagporma sa ilang grupo and sa policy pud diha sa ilang lokal nga pangagamhanan,” matud ni Tribunalo.

Ang operator nga MCM Canyoneering Services nipadayag usab og suporta sa desisyon ni Davide. “As a responsible operator, this is important to us since we want to abide the law and assure the safety of our guests and tour guides,” tipik sa pamahayag sa MCM.

Ilang giawhag ang kagamhanan nga mopahigayon og konsultasyon aron matubag ang nagkadaiyang concern human sa pagsuspenso sa canyoneering ilabi na nga apektado ang panginabuhian sa mga operators ug tour guides.

Matud ni Magallon nga kaniadto mokabat sa 800 hangtud 900 matag adlaw ang moanha sa lugar.  (BANAT NEWS)