Bag-o ang LCPO director, 3 hepe girelibuhan

CEBU, Philippines - Girelibuhan ang tulo sa lima ka hepe sa mga police stations sa Dakbayan sa Lapu-Lapu isip kabahin sa lahugay sa Police Regional Office-7.

Apan si Mayor Paz Radaza nipadayag sa padayong suporta sa kapolisan sa kampanya batok sa kriminalidad ug drugas.

Ang tulo ka hepe giila nga sila si Police Senior Inspectors Percival Miasco, Jimmy Fortes ug Felix Cleopas.

Si Miasco gibalhin sa Olango Police Station, si Fortes sa Marigondon ug si Cleopas sa Mactan Police Station.

Ang nagpabilin mao si Senior Inspector Wayne Magbanua sa Pusok Police Station ug Senior Inspector Jaime Tolentino sa Gun-ob Police Station.

Gawas niini, nilingkod na usab isip director sa Lapu-Lapu City Police Office si Police Senior Superintendent Rommel Cabagnot, ang kanhi provincial director sa Samar ug nahimo sab siyang sakop sa Special Action Force ug presidential security guard ni kanhi Presidente Fidel V. Ramos.

Si Cabagnot ang nihulip ni Senior Superintendent Arnel Amor Libed.

Nagkanayon si Radaza nga pipila na sila ka higayon nga nag-estorya ni Cabagnot bahin sa kampanya sa siyudad batok sa ilegal nga drugas.

Si Cabagnot nitataw nga peace and order sa dakbayan ang gisalig ni Radaza kaniya ug sa LCPO.

Walay nakitang problema si Cabagnot kang Radaza ug nagkanayon nga suportado sa mayor ang nagkalain-laing programa sa kapolisan ilabi na ang pagbansay-bansay sa mga sakop niini aron mahanas og maayo ang abilidad sa pagresponde sa mga krimen.

Wa mananghid

Samtang giangkon ni Talisay City Mayor Eduardo Gullas nga wala siya nalipay sa paghulip sa ilang hepe nga si Supt. Germano Mallari.

Si Gullas nasagmuyo dihang nipuli si Supt. Aileen Recla isip hepe sa kapolisan sa Dakbayan sa Talisay nga wala man gani siya konsultaha.

Matud ni Gullas nga iyang giprangkahan si Senior Supt. Jose Macanas, director sa Cebu Provincial Police Office, atol sa turn-over of command nila ni Mallari ug Recla.

Subay sa balaud, ang mayor papilion sa tulo ka pangalan sa mga opisyal sa kapolisan nga mahimong hepe. Matud ni Gullas nga nakasabot siya sa gibati ni Mayor Tomas Osmeña dihang kalit lang usab gihulipan ang director sa Cebu City Police Office nga wala usab hatagi og higayon nga makapili.

Hinoon nipasalig si Macanas nga si Recla usa lang ka officer-in-charge sulod sa usa ka buwan ug mahimo kining mailisan sa pagpupos sa panahon nga gihatag kaniya.

Si Gullas nipadayag nga kung makahimo si Recla sa tahas sa pagdakop og dakung tawo nga nalambigit sa ilegal nga drugas sa siyudad, hayan siya mismo ang mohangyo sa kadagkuan sa kapolisan nga ilakip kini sa lista sa mga papilian kaniya.  (BANAT NEWS)