10 ka inmates namatay

CEBU, Philippines - Napulo ka piniriso sa Cebu Provincial Detention and Rehabilitation Center (CPDRC) ang nangamatay sukad naghinapos nga bahin sa buwan sa Hunyo hangtud niining buwana.

Giingong ang maong mga piniriso pareho-pareho og mga gipamati sa lawas nga maglisud sa pagginhawa ug kasagaran kanila nangamatay diha sa Vicente Sotto Memorial Medical Center (VSMMC) matud sa jail warden nga si Romeo Manansala. Niadtong Hunyo 21 ug 28 duha ka priso ang namatay.

Ang duha nag-atubang og kasong kalapasan sa Akta Republika 7610 kon “Child Abuse” ug Akta Republika 10364 kon “Anti-Trafficking in Person Act”  ug murder .

Pagka Hulyo 2 namatay usab ang usa ka 29 anyos nga may kasong rape.

Niadtong Hulyo 18 tulo ang nangamatay nga dunay kasong “concealing of deadly weapon”; may  kasong kalapasan sa Akta Republika 9165 kon “Comprehensive Dangerous Drugs Act”; ug  nag-atubang og kasong homicide.

Pagkasunod adlaw niana, namatay na usab ang 31 anyos nga may kaso gihapon sa ilegal nga drugas.

Hulyo 21 namatay usab ang 41 anyos nga may kasong murder  ug gisundan pagka Hulyo 22 ug 24 og laing nangamatay na usab nga inmates nga may kasong  attempted murder ug ilegal nga drugas ug paghupot og armas.

Ang mga nurses diha sa CPDRC pinangulohan ni Merryssa Baring mibutyag nga kasagaran sa mga piniriso nga dad-on diha sa CPDRC “physically fit” base sa ilang medical certificate gikan sa doktor nga mihiling kanila.

Apan silang Lagunda ug Bastisimo giingong adunay sa sakit sa baga ug sakit sa atay dihang nasulod sa prisohan.

Gipasabot ni Baring nga kasagaran nga mga piniriso diha sa CPDRC taga probinsiya ug nagtuo siya nga nakalitan ilang lawas.

Kini maoy hinungdan nga giapil gyud nila sa mga buhaton sa mga piniriso ang pagsayaw aron usab sila ma-exercise.

Gibutyag ni Baring nga karon aduna silay walo ka piniriso nga nasakit og tuberculosis (TB) sa ilang infirmary  nga ilang gitambalan.

Si Manansala sa iyang bahin nagkanayon nga ang CPDRC aduna karoy kapin sa 2,900 ka  priso ug naghuot na gyud kini.

Ang mga selda may  kapasidad lang  nga 12, 16 ug18 apan karon adunay selda  20, 30 ug 40 ka piniriso ang sud.

Gituohan nga tungod  niini wa nay preskong hangin nga makasulod  maong daghan ang nasakit. (BANAT NEWS)