Kapitolyo motuman sa mando ni Duterte

CEBU, Philippines - Andam motuman ang Kapitolyo sa mando ni Presidente Rodrigo Duterte nga tulo lang ka adlaw mahuman ang transaksiyon sa mga dokumento sa mga buhatan sa gobiyerno.

Matud ni Provincial Administrator Mark Tolentino nga wala silay supak ug mangita sila og paagi nga matuman ang kamanduan sa Presidente sa nasud. Buot sa Presidente nga ang mga kliyente ilabi na kadtong mga yanong tawo dili na malangan sa pagbalik-balik sa pag-follow-up sa pagkuha sa mga dokumento nga ilang gikinahanglan. Gipasabot usab ni Tolentino nga ang pagkalangan sa pagpagawas og dokumento sama sa pagpamalit og mga ekipo adunay proseso ug rekisitos nga ilang subayon.

Laing rason nga gipadayag ni Tolentino mao ang ka daghang atimanon sa mga kawani hinungdan nga medyo malangan ang transaksiyon. Sa laing bahin, giklaro ni Tolentino nga gihangop nila ang Executive Order labot sa Freedom of Information (FOI).

Tumong niini nga walay itago nga transaksiyon ang mga opisyal ug mga buhatan sa gobiyerno ngadto sa publiko.

Sayo niini si Tolentino niluwat og kamanduan nga kinahanglang may pagtugot sa department head una mopagawas o mohatag og dokumento ngadto sa mangayo sama sa media.

Apan matud niya nga wala pa sila kadawat sa kopya sa EO sa Presidente ug siya nagtuo nga alang lang kini sa mga nasudnong ahensiya sa gobiyerno.

Ila pang sutaon kung apil ba ang mga lokal nga ahensiya sa gobiyerno. (BANAT NEWS)