Gilupig ang manifesto

Nalupig ang manifesto nga gipirmahan sa 12 ka mga tawo nga nagpailang nagpaluyo sa kampanya ni President-elect Rodrigo Duterte dinhi sa Sugbo, ug nagsupak sa appointment ni Mike Dino isip presidential assistant for Visayas.

Kini kay sa wala pa diay nila ipagawas ang manifesto, mismong umaabot House Speaker Bebot Alvarez, presidente sa Cebu Chamber of Commerce and Industry Melanie Ng, negosyanteng si Norberto Quisumbing, iladong interior designer nga si Kenneth Cobonpue nga classmate ni Dino, ug Lito Osmeña, naningog nga suportado nila si Dino pagka-presidential assistant.

Misunod ang manifesto sa Association of Barangay Council ug sa mga konsehal sa barangay, nga nagsuporta kang Dino.

Hinuon, kun ikomparar ang mga personalidad nga namirma sa manifesto batok kang Dino ug ang mga tawo nga pabor sa iyang pagkatudlo isip presidential assistant, makita ang kalahian. Sa manifesto nga nagkuwestiyon sa appointment ni Dino gipanguluhan sa kanhi aktibista nga si Rex Fernandez.

Unsa ka tinuod nga adunay duha sa namirma nalambigit og ilegal nga drugas ug ilegal nga sugal sa kasadpang Sugbo? Unya mao kini mosupak sa appointment ni Dino? Ngano man, hadlok silang tumbahon ni Digong ini'g sugod sa tulo ngadto sa unom ka bulan nga kampanya batok kriminalidad?

Adunay namirma sa maong manifesto nga mga walhon. Ang nakaparat pa gyud, kay human nila gikuwestiyon ang pagtudlo ni Dino isip representante sa presidente sa tibuok Kabisay-an, nagsumiter usab sila og mga ngalan nga itudlo ni Digong isip presidential assistant. Klaro diay'ng suya-suya ra gyud ning ilaha.

Dili ba kaha masuko si Digong nga adunay mga tawo nga buot nang mokuwestiyon sa iyang awtoridad isip pangulo sa nasud pinaagi sa pagsupak kinsay iyang gustong ibutang isip presidential assistant, bisan wala pa gani siya makalingkod?

* * *

Daghan pa ang mga druglord nga nailhan sa mga tawo nga anaa mag-operate dinhi sa Sugbo ug sa Kabisay-an. Apan mahibulong ko nganong ang mga operasyon niini anaa lamang magtuyoktuyok sa usa ka ngalan - Jaguar Diaz.

Karong bag-o, si Rowen "Yawa" Secretaria gihulagway ni Sr. Insp. Henrix Bancoleta sa RAIDSOTG-7 nga labing dakong drug pusher sa rehiyon siete nga mipuli ni Jaguar.

Nasayod si Bancoleta nga si Yawa usa lamang sa mga dagkong drug pusher nga naglabanglabang na sa iyang operasyon sa laing mga probinsiya agi sa isla sa Banacon.  Adunay dakong druglord mismo dinhi sa Sugbo nga nakig-abin og usa ka dakong politiko sa habagatang lungsod. Apan nganong wala man koy nadunggang balita gikan sa mga awtoridad mahitungod niini?

Kun sa pagkakaron maklaro nato ang pabor-pabor nga operasyon sa kapolisan ngadto sa piniling personalidad nga nagnegosyo og drugas, dili kaha tumbahon lang nila ang pipila aron ipakita nga naglihok sila subay sa "marching order" unya ni Digong, samtang pasagdan ang uban nga himuon nilang gatasan?