Runningmate ni Lagon nadakpan

CEBU, Philippines - Gawas sa usa ka maestro, lakip sa 14 nga nadakpan sa pagpangronda sa kapolisan sa Sambag 1, Dakbayan sa Sugbo sa nakalabay nga hapon ang kandidato sa pagka-bise mayor sa Lungsod sa Tuburan sa nakalabay nga eleksiyon.

Giangkon ni Alex Montecillo, 30-anyos, nga siya ang runningmate ni Daphne Lagon sa One Cebu Party apan iyang gihimakak nga nalambigit siya sa kalihukan sa ilegal nga drugas.

Ang kampo ni Lagon niklaro nga ang iyang runningmate mao si kanhi konsehal Sesinando Potencioso apan wala na naapas sa pag-imprinta sa balota maong ang pangan ni Montecillo lang gihapon ang nabutang sa opisyal nga balota.

Matud ni James Gallarde, kandidato sa pagka-konsehal, nga adunay resolusyon ang Commission on Elections nga nag-ila kang Potencioso nga maoy opisyal nga runningmate ni Lagon.

Target sa pagpangronda sa mga sakop sa City Anti-Illegal Drugs Special Operations Task Group sa Cebu City Police Office mao sila si Archie Roma ug Bayani Alcomendras.

Sumala pa ni Montecillo nga naabot siya sa maong dapit kay gipaadto sa iyang higala nga si Josephine Tabotabo, 37, aron mamalihug nga magpadala og kwarta sa iyang anak sa Dakbayan sa Toledo.

Sunod semana magsugod na unta siya sa trabaho sa usa ka call center company.

Si Tabotabo niangkon nga nakonsensiya gyod siya sa nadangatan ni Montecillo kay igo lang kini niya nga gipahapit sa iyang gipuy-an.

Gihimakak usab ni Tabotabo nga drug den ang ilang gipuy-an kun dili usa kini ka boarding house.

Samtang ang maestro nga nadakpan nga si Jeramel Sanchez, 34, hugot usab nga nilimod sa pasangil sanglit naabot siya sa maong dapit aron pagpangita og kaabangan nga lawak kay may tambungan nga seminar sa Dakbayan sa Sugbo.

Ang iyang mga kauban nga mga maestro ug maestra anaa nagpuyo sa Ecotech Center sa Lahug apan gumikan kay puno na ang lugar nangita si Sanchez og laing          dapit.

Si Sanchez niingon nga iyang napili ang maong lugar diin siya nag-abang kaniadto nga nagtungha pa siya.

Gitahasan sa Department of Education-Cebu Province Division ang district supervisor sa Barili District 1 nga si Dr. Paterno Dandan sa pag-imbestigar labot sa pagkasikop ni    Sanchez.

Si Sanchez residente sa Barangay Poblacion, Barili samtang si Dandan niingon dunay magtutudlo nga naghupot sa maong ngalan sa Kangdampas Elementary School apan dili pa siya segurado kung mao ba ang nadakpan.

Matud ni Dandan nga makig-alayon siya sa kapolisan ug ang report maoy iyang iduso ngadto sa ilang labaw. (BANAT NEWS)