Bayad sa basura makiangayon – Labella

CEBU, Philippines - Gihulagway ni reelected Cebu City Vice Mayor Edgardo Labella nga makiangayon ra ang P1,500 nga bayad sa matag tonelada nga basura sa dakbayan nga mahakot paingon sa pribadong landfill sa Consolacion.

Reaksyon kini ni Labella sa pagsaway ni incoming Mayor Tomas Osmeña nga mahal ra kaayo ang bayad ug posibleng adunay mga opisyal nga nakabahin sa maong kantidad.

Matud ni Labella nga kun adunay lig-ong basehanan nga tinuod ang pagduda ni Osmeña angay’ng taralon sa hukmanan ang maong mga mapahimuslanong opisyal.

Gipasabot ni Labella nga sa P1,500 nga bayad sa dakbayan ngadto sa private hauler sa matag tonelada nga basura nga ilang mahakot, ang P700 niini mapunta sa tag-iya sa pribadong landfill isip tipping fee. Ang nahibiling P800 maoy kuhaan sa gasto sa gasolina, driver ug sakyanan nga gamiton sa paghakot. Matud ni Labella nga dili makaato ang mga garbage truck sa dakbayan paghakot sa mga basura. Kada adlaw dul-an sa 400 toneladas nga basura ang mahakot gikan dinhi sa dakbayan sa Sugbo paingon sa pribadong landfill sa Barangay Pulog, Consolacion.

Ang problema sa dakbayan sa Sugbo nagsugod human nga gipasirad-an ni Mayor Michael Rama ang landfill sa dakbayan sa Brgy.Inayawan.

Ang hukom ni Rama nga wala na palabayi og basura ang 15 ka tuig na nga landfill sa Inayawan kay mibahad na ang Department of Environment and Natural Resources (DENR) nga ikiha ang mga opisyal sa dakbayan kun mopadayon paggamit sa landfill.

Ang landfill ipagamit lang unta sulod sa walo ka tuig ug tungod kay miabot na man og 15 ka tuig, nagtipun-og karon ang mga basura ug gikahadlokan nga makadaot na sa kalikupan. (BANAT NEWS)