Ambush suspect inosente—Lagon

CEBU, Philippines - Didto sa headquarters sa 1Cebu sa Lungsod sa Tuburan ang suspek sa pag-ambush sa supporter ni Mayor Democrito Diamante dihang nahitabo ang insidente.

Gipakita sa kandidato sa pagka-mayor nga si Daphne Lagon ang close circuit television (CCTV) footage diin ala 1:42 sa hapon niadtong Miyerkules, si kanhi Montealegre barangay kapitan Luduvico Oroquero naglingkod sulod sa ilang headquarters sa Barangay Poblacion V.

Ang pag-ambush kang Rene Cangmaong, usa ka rebel returnee, giingong nahitabo pasado ala una sa maong adlaw sa Barangay Mag-antoy.

Ang runningmate ni Lagon nga si kanhi konsehal Sesinando Potencioso niingon nga si Oroquero kuyog nila nga naniudto mga alas 11:45 sa buntag sa maong adlaw atol sa usa ka tigum sa Tinago, Barangay Carmelo hangtud pasado ala una sa hapon. Ang Carmelo gibana-banang may gilay-on nga kapin sa napulo ka kilometros sa Mag-antoy.

Matud ni Lagon nga makita sa video nga nagsunod-sunod pag-abot sa headquarters sila si Oroquero ug kaubanan.

Gibarogan sa direktor sa CPPO, Sr. Supt. Clifford Gairanod nga lehitimo nga operasyon ang ilang gihimo sa pagsikop kang Oroquero.

Matud pa ni Gairanod ang suspek gitudlo nga usa sa mga suspetsado sa pagpang-ambush nga gikamatay ni Cangmaong. Gani gipasabot ni Gairanod nga atol sa ilang operasyon nasakmit usab nila ang mga high powered nga armas ug daghang mga bala.

Sumala pa ni Gairanod nga kung duna ma’y ebidensya ang kampo ni Lagon ilaha kini nga katungod sa pagdepensa.

Si Daphne Lagon nga una nang nahinabi sa Banat News nagkanayon nga duna sila’y kopya sa close circuit television (CCTV) nga nagpamatuod nga anaa sa ilang command center sa lungsod si Oroquero atol sa pagpang-ambush.

Gihimakak ni Gairanod nga planted ang nakuha nila nga mga armas gikan sa balay ni Oroquero.

“Gusto nyo ba nga matulog na lang kami sa bahay at wala kaming gagawin bahala na kayong  diyan mga politician mag-away away, nandun nga kami to maintain peace and order to maintain neutrality,” saysay pa ni Gairanod.

Samtang gibutyag ni Senior Inspector Leo Logronio, hepe sa Tuburan Police Station nakadawat ang iyang lugar og ubay-ubay nga augmentation force gikan sa Cebu Provincial Headquarters, Regional Public Safety Battalion ug sa Armed Forces of the Philippines aron motabang sa pagpatuman sa hapsay, malinawon, luwas ug patas nga piniliay karong Mayo 9, adlaw'ng Lunes.

Sila mopahigayon og 24-oras nga checkpoint aron di makaporma sa mga plano aron guboton ang piniliay.

Niadtong tuig 2013 ang Lungsod sa Tuburan nalakip gihapon sa Election Watchlist Areas (EWAS) ug karong tuiga nalakip gihapon, matud ni Logronio, ‘intense’ gyud ang panagribal sa politika sa maong lungsod.

Ang maong lungsod adunay 54 ka barangay. (BANAT NEWS)