Davide ug Duha ka opisyal gikasohan

CEBU, Philippines - Gipasakaan og  kasong kriminal ni kanhi gobernador ug kongresista Pablo “Pabling” Garcia ang tulo ka opisyal sa Probinsya sa Sugbo.

Ang gikasohan mao sila si Gob. Hilario Davide III, Bise Gob. Agnes Magpale ug Atty. Orvi Ortega. Kasong technical malversation of public funds, falsification of public document ug kalapasan sa Anti-Graft and Corrupt Practices Act didto sa Office of the Ombudsman-Visayas.

Ang maong reklamo kabahin kini sa giingong paggamit sa Kapitolyo sa P72 Milyones nga Priority Development Assistance Fund (PDAF) ni Garcia. 

Ang PDAF ni Pabling iya kini gihatag sa Probinsya sa Sugbo aron pagpatuman sa mga programa ug proyekto ngadto sa Segundo Distrito kun asa nahimong kongresista si Garcia.

Apan sa dihang nasuspenso si kanhi gobernadora Gwendolyn Garcia niadtong 2012 ug nahimong acting governor ang karon nga bise gobernador Agnes Magpale, giingong wala giaprubahan ang mga tseke ug vouchers alang unta sa pag-implimentar sa mga programa.

Matud ni Pabling nga kanunay siya mi-follow up ngadto sa buhatan ni Magpale kabahin sa mga programa sa iyang distrito gamit ang iyang PDAF apan gipahibalo siya sa provincial treasurer nga nangayo pa og opinion si Magpale ngadto sa Department of Budget and Management kabahin sa maong PDAF.

Sa tubag usab  ni DBM Secretary Florencio Abad, siya misaysay nga ang PDAF ni Garcia nga gideposito sa Kapitolyo makonsiderar nga trust fund ug ang  Kapitolyo isip maoy trustee o administrator maoy responsable sa pagsiguro nga ang pagpagawas sa maong pundo subay sa katuyoan nga gi-specify sa trustor/proponent legislator nga si Garcia.

Si Garcia misulat kini ngadto sa probinsya nga ibalik na lang ang PDAF ni Garcia ngadto sa House of Representatives kun diin naggikan ang maong pundo.

Sa panahon ni kanhi gobernador Gwendolyn Garcia, iyang gisulatan ang provincial treasurer nga ibalik ngadto sa kongreso ang PDAF apan nasayran na lang ni Pabling sa panahon na sa administrasyon ni Davide, ang maong pundo wala mabalik didto sa Kongreso kay nagamit na kini sa Kapitolyo.

Matud pa nga kapin P31 Milyones na lang ang nahabilin sa iyang PDAF ug ang nagasto didto kini gipondo sa mga proyekto nga wala gi-identify ni Garcia.

Sa affidavit ni Garcia, siya mipasangil nga gi-falsify usab sa provincial legal officer ang desisyon sa Korte Suprema kabahin sa pagdeklarar nga unconstitutional ang PDAF.

Ang maong legal opinion ni Ortega giuyonan ni Davide hinungdan nga nagasto ang PDAF ni Garcia.

Sa habig sa probinsya sa Sugbo, si Davide pinaagi sa text message ngadto sa tigpamaba sa Kapitolyo Ethel Natera nagkanayon nga ang mga reklamo sa kanhi gobernador  walay basehan ug nangita ra og media attention si Garcia.

Banat sa gobernador nga posible rang moapil sa Guinness Book of World Records ang kanhi gobernador sa pag-file niini og walay hinungdan nga mga kaso. (BANAT NEWS)