Davide napobre og P.5M
CEBU, Philippines - Mikunhod og tunga sa milyon ang net worth ni Gob. Hilario Davide III sa tuig 2015. Gikan sa P19.4 milyones niadtong tuig 2014, miubos ngadto sa P18.9 milyones ang net worth sa gobernador base sa iyang gisumiter nga Statement of Assets Liabilities and Networth ngadto sa Office of the Ombudsman-Visayas.
Sa SALN sa gobernador miabot sa P22.5 milyones ang iyang total assets lakip kini sa iyang real properties nga P7.9 milyones, nga gilangkoban sa iyang gipanag-iya nga 4 ka residential ug 1 ka agricultural property sa Dakbayan sa Mandaue, Dakbayan sa Sugbo, ug sa Taguig City.
Samtang moabot og P14.6 milyones ang iyang personal properties. Apan ang gobernador aduna usab liabilities o utang nga moabot sa P3.6 milyones naglakip na sa housing loan, car loan, ug credit cards, hinungdan nga P18.9 milyones na lang iyang total networth.
Samtang moabot ngadto sa P59 milyones ang SALN ni bise gobernador Agnes Magpale sa tuig 2015, misaka kini gikan sa P58 milyones niadtong 2014.
Sa total assets ni Magpale, moabot sa P17.8 milyones ug ang real properties lakip dinhi ang tulo ka residential, upat ka commercial, usa ka agricultural ug usa ka mix-used properties.
Moabot sa P41.2 milyones ang iyang personal properties, lakip na niini ang iyang bank accounts, paintings, alahas, appliances, duha ka sakyanan ug mga investments. Ang bise gobernador walay liabilities o utang.
Niadtong Abril 30 maoy deadline sa mga opisyal ug empleyado sa gobiyerno nga mosumiter sa ilang SALN.
Ang pakyas nga makasumiter niini mamahimong makasohan og kalapasan sa Section 8 sa Republic Act 6713 o ang Code of Conduct and Ethical Standards for Public Officials and Employees. (BANAT NEWS)
- Latest
