Campaign jingle nakamugna og tensiyon

CEBU, Philippines - Giawhag ni Police Senior Superintendent Jonathan Cabal, director sa Mandaue City Police Office, ang manag-atbang nga grupo sa mga kandidato sa dakbayan nga pakalmahon ang ilang mga supporters.

Kini human nitumaw ang tensiyon dihang giingong gisamok sa sakyanan nga nagpatukar sa campaign jingle ni Konsehal Emmarie “Lolypop” Ouano-Dizon sa One Cebu ang mini-rally sa kampo ni Kongresista Gabriel Luis “Luigi” Quisumbing sa Liberal Party sa Barangay Opao sa niaging gabii.

Gisubay sa kapolisan ang nahimutangan sa tukar sa may Villa Mangga ug nasuta nga walay drayber ang sakyanan sa kampo ni Ouan-Dizon.

Matud ni Cabal nga dili gyud maayo ang gibuhat sa drayber kinsa posibleng nitago aron paglikay nga dakpon sa kapolisan.

Gimanduan ni Cabal ang iyang mga station commanders nga likayan nga masubli ang susamang insidente.

Buot ni Cabal nga mamintinar ang respetohay tali sa duha ka grupo aron limpyo ug magmalinawon ang eleksyon sa dakbayan.

Apan alang kang Ouano-Dizon nga gamay ra kaayo ang maong isyu.

Matud ni Ouano-Dizon nga dili malikayan nga sa lugar nga kampanyahan sa usa ka grupo nga naa usab ang laing grupo.

Atol sa pagsuwat niining balitaa, wala pa nihatag og pamahayag si Quisumbing labot sa maong insidente. (BANAT NEWS)