Cash bonus sa Cebu City-DepEd aprobado na
CEBU, Philippines - Daku ang kalipay sa mga magtutudlo human naaprobahi sa konseho sa Dakbayan sa Sugbo ang ilang tag P10,000 nga cash bonus.
Si Bianito A. Dagatan, city schools division superintendent, nagkanayon nga mapasalamaton sila sa kagamhanan sa dakbayan nga kanunay motabang sa Department of Education.
Base sa ordinansa, ang dakbayan mohatag og P10,000 nga cash bonus sa tanang DepEd school teachers sa primary ug secondary matag tuig nga giduso ni Konsehal Lea Ouano Japson niadtong Abril 14. Ang ordinansa naaprobahan niadtong Miyerkules ug nadawat ni Daniel G. Gudelosa, assistant schools division superintendent officer-in-charge.
Gawas sa mga magtutudlo, apil na usab sa maong ordinansa ang mga guidance counselors, librarian, vocational instructors, supervisory ug administrative functions nga anaa ubos sa DepEd.
Ang P10,000 nga cash bonus madawat matag Disyembre ug ang budget nga kapin sa P50 milyones matag tuig iapil sa general fund sa annual budget sa dakbayan. (BANAT NEWS)
- Latest
