Nagpailang taga-telecom kawatan diay

CEBU, Philippines - Gipahimangnuan sa kapolisan sa Siyudad sa Talisay ang publiko nga dili mokompiyansa sa mga tawo nga magpaila nga empleyado sa usa ka kompaniya nga mohatag og serbisyo sa internet o sa telepono.

Kini tungod kay daghan na ang nabiktima sa maong grupo nga manguha og mga kagamitan sama sa modem, sim card ug uban pa.

Labing uwahing nidangop sa kapolisan mao si Alberto Lariosa, 25-anyos, taga Bulacao.

Duha ngadto sa tulo ka tawo ang niadto sa ilang panimaye ug niingon nga ilang i-upgrade ang ilang internet connection.

Matud niya nga dali ra silang nisalig tungod kay naka-uniporme ang mga suspek apan nilabay na ang pipila ka oras kalit lang nga nawagtang ang mga suspek ug wala gani nakapananghid.

Didto na nila nabantayi nga kawatan ang mga tawo dihang ilang gipangutana sa kompaniya kun nganong aduna nay deperensiya sa ilang internet connection.

Si Supt. Germano Mallari, hepe sa kapolisan sa dakbayan, nagkanayon nga magmabinantayon ang tanan ilabi na sa mga mahabilin sa balay.

Tambag niya nga pangitaan og identification card sa kompaniya nga gitrabahuan aron maseguro.

Maayo usab nga tawagan una ang kompaniya ug susihon kung tinuod ba gyud nga ila ang maong mga tawo.

Nagkanayon si Mallari nga kung magduda nga kawatan ang maong tawo, motawag dayun og mga polis.

Niabot na sa lima ka tawo ang nabiktima sa susamang modus operandi sa dakbayan. (BANAT NEWS)