SugBonanza 2016 himuon sa Mayo 1

CEBU, Philippines - Magpahigayon ang Dakbayan sa Sugbo og SugBonanza 2016 The City Services karong Domingo, Mayo 1 sa alas  7 sa buntag hangtod alas 3 sa hapon diha sa Plaza Independencia.

Ang programa sugdan pinaagi sa usa ka misa og sundan dayon sa Labor Day Run gikan sa Block 27 sa North Reclamation Area paingon ngadto sa Plaza Independencia nga giulohan sa Cebu City Sports Commission. Ang tanang serbisyo buksan sa alas-8 sa buntag nga gitunga ngadto sa siyam ka tents.

Sa una nga tent, mao ang City Treasurers Office (CTO) diin ipanghatag ang mga honorariums sa mga driver/loader, tanod/lupon, job orders, BEO, medical ug burial assistance.

Ang City Assessor’s Office mo-isyu usab og Tax Declaration ug certification para sa property holdings ug certified true copy sa Tax Declarations ug motudlo kun unsaon paghimo og liquidation reports, budget preparation ug execution.

Aduna say tent ang Department of Social Welfare Services (DSWS) motanyag og feeding, burial assistance ug distribution lakip na ang medical financial assistance.

Samtang ang Mayor’s Office, City Administrators Office ug Human Resources Development Office adunay mga exhibits sa ikatulo nga tent.  Ang Department of Manpower Development and Placement (DMDP) muhatag og on-site nga demonstration sa food processing sama sa paghimo og chorizo ug skinless, lakip na ang flower arrangement. Motagana usab sila og cosmetology.

Sa ikalima nga tent, mao ang City Health Department ug Cebu City Medical Center (CHD/CCMC) nga nag-organisa og operation tuli, libreng konsultasyon sa bata ug tiguwang, libreng dental consultation nga naglangkob sa oral prophylaxis o cleaning ug ibot sa ngipon, bakuna para sa anti-pneumonia ngadto sa senior citizens, tetanus troxoid ug libreng laboratory ug pharmaceutical services.   Ang Department of Veterinary Medicine and Fisheries (DVMF) nga anaa usab sa ikalima nga tent, mutanyag og spay ug neuter para sa mga iro ug iring. Mohatag usab sila og libreng bakuna para sa anti-rabies, purga sa mga hayopan ug vitamins.

Sa ika-unom nga tent mao ang City Legal Office (CLO) alang sa libre nga legal advice and preparation, notaryo sa mga legal nga dokumento.

Ang City Civil registrar mitanyag usab og serbisyo sama sa registration sa Certificate of Live Birth, Certificate of Marriage, Certificate of Death, delayed nga registration sa civil registry records ug konsultasyon sa civil registration concerns sama sa correction, acknowledgement o legitimation, adoption ug uban pa nga civil registration concerns.

Ang City planning and Development Office (CPDO) sa ikapito nga tent motanyag og issuance sa locational clearances para sa building permit.

Sa ikawalo nga tent mao ang Public Information Office ug Tourism Office nga mupasundayag usab og exhibits.  Samtang ang Management Information and Computer Services (MICS) mutagana og provision para sa GIS Maps.

Nahimutang sa ikasiyam nga tent mao ang City Agriculture Department (CAD) diin may ipanghatag nga mga semilya, liso, abuno, tips pagpamuhi og hayopan.

Kauban sa CAD mao ang Division for the Welfare of the Urban Poor (DWUP) nga motanyag og home lot allocation ug lot acquisition para sa mga socialized housing. Si Atty. Rey Panugaling, Director for Hospital Administration miingon nga ang tanan imbitado lakip ang dili taga Cebu City.

Sa laing bahin,  posibleng adunay paghuot sa trapiko sa maong adlaw alas 4 sa hapon gikan sa Fuente Osmeña paingon sa ALU Compound Dakbayan sa Sugbo tungod sa ipahigayong parada sa mga mamumuo.

Dugang ni Gealon nga magpakatap sila og mga traffic personnel gikan sa Fuente Osmeña padung sa ALU compound.

Sa mao gihapong adlaw, opisyal nang buksan pagbalik ang ubang mga serbisyo sa Cebu City Medical Center (CCMC) lakip na ang mga bag-o nilang libreng serbisyo nga idalit sa publiko.

Ang bag-ong serbisyo mao ang paghatag og libreng tambal, palaboratoryo ug professional fees sa mga doktor kun ang pasyente kabos, pagdawat sa pasyente bisan walay downpayment.

Ang mga pasyente nga walay PhilHealth insurance atol sa ilang admission otomatikong i- enroll og libre pinaagi sa tabang sa mga staff kun buot sa pasyente nga magpa-enroll ug ang tambalanan maoy mobayad sa premium.

Hugot usab ipatuman ang “No Balance Billing Program” kadtong dili ma cover sa PhilHealth otomatikong ma-charge sa gobiyerno.

Buksan usab ang airconditioned emergency room sa Mayo 1. Lakip sa mga gi-atangan sa maong ospital mao ang mas high-tech nga upat ka Intensive Care Units, Surgical Wards, Cardiac Monitors ug advanced life support equipment.

Serbisyo sa OB gyne, pediatrics, dental ug opto ug ang bag-o nga Social Service Office , bag-ong ambulance service ug Biological Utility Operating Room.

Mas taas na usab ang oras sa out-patient service gikan sa alas-8 sa buntag hangtud na kini sa alas-10 sa gabii. Merybeth I. Fernandez ug reports nila ni Moren Ericka Cuizon, Jannine Mendaros (BANAT NEWS)