Lolo nagselos, karibal gipatay
CEBU, Philippines - Gumikan sa selos natanggong sa selda sa kapulisan ang usa ka 66 anyos nga lolo human kini mikomprontasi ug mipsuil patay sa 45- anyos nga lalaki nga iyang giselosan diha sa Sitio Babao Youth, Brgy. Inayawan ning Dakbayan sa Sugbo sa nakalabay nga hapon.
Namatay sulod sa Vicente Sotto Memorial Medical Center (VSMMC) ang biktima nga si Edgar Gonzales, nagpuyo sa Inayawan, samtang gipaslak usab sa prisohan si Caesar Alcantara, taga Sitio Upper Villa Bulsita, Brgy. Bulacao ning dakbayan.
Matud pa ni Senior Police Officer 2 Rommel Bancog, imbestigador sa Homicide Section sa Cebu City Police Office nga nahinabi sa Banat News nga gikomprontasi ni Alcantara si Gonzales kay nagduda siyang karelasyon kini sa iyang 46-anyos nga hinigugma sud na sa lima ka tuig nga nagsugod dihang gihilot sa suspek ang babaye.
Ang biktima trabahante sa agalon sa babaye maong pirme silang magkita ug ning uwahi, gipatrabaho sa babaye ang kasilyas niini hinungdan sa kasilo sa suspek.
Sigun pa ni Bancog giadto sa suspek ang biktima ug dunay nahitabong lalis, apan giingong gipusposan sa biktima og kahoy nga adunay kalayo sa tumoy ang tiyan sa suspek. Ang suspek aduna diay giluklok nga .38 revolver ug pusil sa likod sa biktima. Mitahan ang suspek sa kapolisan samtang gidala sa tambalanan ang biktima.
Samtang ang desk officer sa Pardo Police Station nga si Police Officer 1 Jude Anthony Sonsona nga nahinabi sa Banat News miingon nga nakabsan gayod sa kinabuhi si Gonzales pasado alas 9 sa nakalabay nga gabii samtang gioperahan sa mga doktor.
Sigun pa ni Sonsona nga mismo ang anak sa biktima ang mipahibalo kanila sa nahitabo sa amahan. Sumala pa sa kapolisan, gihimakak sa babaye nga aduna silay relasyon sa suspek. (BANAT NEWS)
- Latest
