Trak natagak sa creek, duha patay

CEBU, Philippines - Duha ang  patay samtang laing usa ang naangol sa aksidente sa kadalanan sa National Highway sa Brgy. Tan-awan, Lungsod sa Oslob niadtong Miyerkules sa hapon.

Nakabsan sa ilang kinabuhi human nalimbuwad ang ilang gisakyan nga trak sila si Rene Dela Cruz, 39, drayber ug lumulopyo sa Brgy. Carreta, siyudad sa Sugbo ug ang kauban niini nga si Ronnel Campaña, 29, taga Sitio Ponce, Brgy.Capitol Site, Cebu City.

Samtang naangol ang drayber sa motor nga si Micky Berongan, 21, molupyo sa maong dapit human kini napagan sa aksidente.

Matud pa ni Police Officer 2 Noel Mamale, desk officer sa Oslob Police Station nga nahinabi sa Banat News, ang trak adunay karga nga mga sabon gikan sa siyudad padung unta og  lugsong sa dihang nawad-an kini og brakes hinungdan nga nasaghiran niini ang kasugat nga motor dayung kalimbuwad ug natagak sa creek nga kilid sa kalsada.

Dugang pa ni Mamale nga kusog ang dagan sa maong trak hinungdan nga wala na makontrol sa drayber ang dagan niini.

Ang drayber sa motor nakaangkon og mga gagmay’ng samad sa maong hitabo. Daling gidala ang mga biktima sa usa ka tambalanan apan gideklarar ra usab sila nga dead-on-arrival tungod sa kadaot nga naangkon sa ilang kalawasan. (BANAT NEWS)