Nakapalit sa giulod nga de lata nidangop sa DVMF
CEBU, Philippines - Nidangop na sa buhatan sa Cebu City Department of Veterinary Medicine and Fisheries kadto’ng nakapalit og de lata nga napuno sa ulod sa usa ka supermarket.
Matud ni Dr. Jennifer Laurente sa DVMF nga niduso na sa iya’ng incident report si Eddie Dinapo, taga Lumbani Subdivision, Guadalajara, Barangay Guadalupe, ug bitbit usab niini ang duha ka lata sa beef loaf nga napuno sa ulod.
Sumala pa ni Laurente nga makig-alayon sila karon sa rehiyonal ug ulohang buhatan sa National Meat Inspection Service aron padad-an og sulat ang tindahan para masayran kung asa nila nakuha ang mao’ng produkto ug kinsa usab ang supplier.
Gibutyag ni Laurente nga ila’ng ipa-recall ang kauban nga batch sa mao’ng beef loaf kay basin usab unya og mahitabo kini sa laing kustomer.
Giawhag ni Laurente ang mga manufacturers nga siguruhon nga luwas ug limpyo ang ila’ng mga produkto tungod kay mao lamang kini ang bugtong madali-dali pagpalit sa mga konsumedor.
Awhag usab ni Laurente sa mga konsumedor nga siguruhon nga dili expire ang mga gipalit nga mga de lata nga pagkaon ug kinahanglan nga wala’y lumping ug burot ang mga lata.
Si Dinapo sa iya’ng bahin nibutyag nga nihimo siya og lakang sa pagtaho sa mao’ng insidente para dili na kini masubli ngadto sa laing tawo nga posible’ng mao’y hinungdan sa sakit. (BANAT NEWS)
- Latest
