Barges pabiyahion tungod sa traffic

CEBU, Philippines - Nahasol karon ang mga motorista ug mga sumasakay tungod sa grabeng kahuot sa dagan sa trapiko sa Marcelo Fernan Bridge ug sa Mandaue-Mactan Bridge nga kasamtangan nga giayo karon sa Department of Public Works and Highways (DPWH)-7.

Niadtong adlaw’ng Lunes pa lang, Pebrero 8 sa unang adlaw sa pag-ayo sa MMB daghang motorista ug pasahero ang nagbagutbot gumikan kay dul-an sa upat ka oras sila natanggong sa trapik diha sa MFB.

Tungod sa mga reklamo, usa ka emergency meeting ang gipahigayon sa buhatan sa DPWH-7 diha sa South Road Properties nga gitambungan sa mga local chief executives sa Mandaue ug Lapu-Lapu City, Maritime Industry Authority, Cebu Ports Authority(CPA) ug sa mga shipping companies sama sa Lite Ferries ug Gothong Lines.

Gisabutan ang pagpangita og alternatibong transportasyon aron di maghuot ang mga sakyanan diha sa MFB nga mao lang ang nagpabiling abli kay ang MMB sirado ang usa ka lane niini kutob sa Disyembre 23.

Nasabotan sa grupo nga mogamit og dagkong barges ug ferryboats alang sa mga pasahero gikan sa Cebu City, Mandaue padung ug balik sa Lapu-Lapu City.

Karong adlawa gikatakdang makigtagbo ang director ngadto sa mga resort owners aron tugotan kadtong mga barges ug ferryboats nga makadunggo.

Sila si Mandaue City Mayor Jonas Cortes ug Lapu-Lapu City Mayor Paz Radaza uyon sa maong plano. Si Cortes miingon nga nahimo na kini kaniadto sa dihang wala pa ang mga taytayan.

Ang mga barges usab maoy gigamit kaniadto human gikuso-kuso ang Sugbo sa bagyong Ruping niadtong 1990 diin naguba ang MMB.

Laing problema usab nga gipanglantawang masinati mao unya ang supply sa tubig sa Lapu-Lapu gikan sa Metropolitan Cebu Water District (MWCD) tungod kay posibleng matandog ang pagkamuntar niini sa maong taytayan.

Si Vice Mayor Edgardo Labella sa Dakbayan sa Sugbo, lakip sa natanggong sa trapik sa Lapu-Lapu sulod sa upat ka oras kagahapon sa buntag.

Si Labella nagkanayon nga mopadala og suwat sa Department of Transportation and Communications aron ibalik ang barge service ug padugangan ang biyahe sa mga ferry boats.

Si Labella, nipadayag nga dili maayo sa negosyo ug sa ekonomiya sa Metro Cebu kung dili kini pangitaan og solusyon.

Sa laing bahin, dili lang ang mga dalan sa tiilan sa duha ka taytayan ang naproblema sa trapiko sa Dakbayan sa Mandaue tungod kay hasta ang mga dalan gikan sa maong siyudad padung sa Consolacion nakasinati og problema sa trapiko.

Matud pa nga gikan sa reclamation area sa Mandaue, ang mga pasaheroan maabtan og tulo ka oras una pa makaabot sa Consolacion tungod sa kahuot sa mga dalan.Si Mariano Aliño, 52 anyos nga drayber sa PUJ gikan sa nahisgotang lungsod nga nahinabi sa Banat News mipadayag nga hinay kaayo ang pag-irog sa mga sakyanan hinungdan naapektahan ang ilang kita ug nabalaka silang ingon niini pirme ang mahitabo matag adlaw.

Gustohon man nilang mosayo og biyahe apan alkanse gihapon tungod kay ang mga tawo wala pa man mogikan sa ilang mga balay padung sa trabahoan. (BANAT NEWS)