Mga motorista pasayuhon og gikan

CEBU, Philippines - Gipaabot nga grabeng kahuot sa trapiko ang masinati sugod karong adlawa  human gisugdan sa Department of Public Works and Highways ang pag-ayo sa Mandaue -Mactan Bridge kagahapon.

Kagahapong adlawa, wala pa kaayo kini masinati tungod kay wala may klase ug way trabaho tungod sa Chinese New Year.

Nagkanayon si Frank Brazil, hepe sa City Traffic Management Systems sa Dakbayan sa Lapu-Lapu nga nagbutang sila og mga traffic signs padulong sa diversion road alang  sa tanang motorista.

Ang diversion road nahimutang sa Sitio Matumbo, Brgy. Pusok lahos sa Sitio New Sangi, Brgy. Pajo ug kini two-way traffic  sa likod nga bahin sa City Hall.

Nasayran sa Banat News nga kagahapon nakasinati na og paghuot sa mga sakyanan diha sa Marcelo Fernan Bridge apan nakontrolar kini sa CTMS.

Kapin sa 30 ka mga CTMS enforcers ang ipakatap nga bahin og duha ka shifts.

Sa miaging mga report, usa ka lane sa first bridge lang giablihan, alang sa mga sakyanan gikan sa Mandaue padulong  sa Lapu-Lapu.

Ang mga mogawas gikan sa Lapu-Lapu adto paagion sa Marcelo Fernan Bridge padulong sa ilahang mga destinasyon.

Si Mayor Paz Radaza sa Lapu-Lapu mipahimangno sa publiko nga mosayo gyud og biya sa ilang mga panimalay ilabi na kadtong magsakyanan.

Aduna say alternatibong masakyan padung sa Cebu City pinaagi sa ferry gikan sa Muelle Osmeña  sa Poblacion.

Matud sa DPWH, ang pag-ayo sa maong taytayan molanat hangtud Disyembre 23.

Sa habig sa Dakbayan sa Mandaue, gipahibalo ni Glenn Antigua nga maoy operation chief sa Traffic Enforcement Agency of Mandaue (TEAM) adunay 30 ka mga traffic enforcers  nga magbantay sa kadalanan nga nagpaingon sa Dakbayan sa Lapu-Lapu ug mga dalan nga nagpaingon sa amihanang bahin sa lalawigan.

Ang mga traffic enforcers anha ibutang sa dalan S.B. Cabahug, Ouano Avenue,  U.N. Avenue, M.C. Briones ug mga dalan nga nagpaingon sa Marcelo Fernan Bridge ug Mandaue- Mactan Bridge. 

Sa unang adlaw nga pagsirado sa dalan D.M. Cortes ug A. Soriano Avenue kagahapon wala kaayo masinati ang suliran sa trapiko tungod kay minus man ang nanagan nga sakyanan.

Si Antigua miingon nga samtang giayo ang maong taytayan nagpahigayon usab og road concreting sa dalan D.M. Cortes ug A. Soriano dungan usab nilang gipatuman ang 60 ka adlaw nga dry run alang sa “No Left Turn”  sa eskina Sudlon, Maguikay ug eskina sa Tabok sa maong dakbayan.

Hinuon gitataw ni Antigua nga nagpahimutang sila og mga traffic signs sa maong mga dalan nga magsilbing giya sa mga drayber.

Ila usab higpitan ang pagdili pagpataka og parking sa mga dalan kay ilaha kining birahon. (BANAT NEWS)