COMELEC: Parehistro na
CEBU, Philippines - Subli’ng nanawagan ang Commission on Elections sa mga botante nga wala pa’y biometrics nga dili na maghuwat sa deadline.
Si Atty. Lionel Marco Castillano, provincial election supervisor, nagkanayun nga sa 2,588,029 ka rehistrado’ng botante sa tibuok Sugbo, 120,469 na lang ang wala pa’y biometrics.
Matud ni Castillano nga ang off-site registration sa kabarangayan nakatabang sa pagkunhod sa gidaghanon sa wala’y biometrics.
Ang mga botante kinsa wala nakabotar sa duha ka sunod-sunod nga eleksiyon ang dili na makabotar sa sunod eleksiyon.
Ang botante kinahanglang moadto sa buhatan sa Comelec aron magpa-reactivate sa record.
Ang off-site registration sa kabarangayan padayun hangtud matapos ang buwan sa Septiyembre ug ang pagpangrehistro sa mall molanat hangtud sa buwan sa Oktubre.
Ang Comelec nihangyo sa publiko nga dili na maghuwat sa katapusang adlaw aron dili sila makasinati og kahasol.
Matud ni Castillano nga posible’ng dili nila matagad ang tanang magparehistro sa katapusang adlaw tungod kay ang computer duna lang kini kapasidad nga 200 ka tawo ang marehistro. (BANAT NEWS)
- Latest
